کتاب “وَنڈ” دی مُکھ وکھالی

سانجھے ویڑھے ولوں پنجاب دی وَنڈ اتے الیاس گھمن جی ہوراں ولوں جوڑیاں گئیاں کہانیاں دی کتاب دے دو پراگے “ونڈ-1 ونڈ-2” دا مکھ وکھالی اکٹھ 03 جون 2023 سانجھا ویڑھا قصور وچ ہوئیا

علی بابر

سانجھے ویڑھے ولوں پنجاب دی وَنڈ اتے الیاس گھمن جی ہوراں ولوں جوڑیاں گئیاں کہانیاں دی کتاب دے دو پراگے “ونڈ-1 ونڈ-2” دا مکھ وکھالی اکٹھ 03 جون 2023 سانجھا ویڑھا قصور وچ ہوئیا۔ایس پروگرام دی پردھانگی تاریخ، سیاست اور قانون دے استاد جناب صدیق ڈوگر ایڈووکیٹ صاحب نے کیتی جہیڑے کہ آپ 85 ورہیاں دے نیں اور ونڈ بارے سب کجھ آپ آکھیں ڈِٹھا اور بُھوگیا ہے۔

اُچیچے پروہنیاں وچ پروفیسر حمزہ ورک، ڈاکڑ ناصر بلوچ، مدثر اقبال بٹ، کامریڈ عابدہ چوہدری، اقبال قیصر تے خادم علی کھوکھر شامل سن۔گل بات کرن والیاں سجناں وچ حمید اختر ناصری، پروفیسر ڈاکڑ ارشد شاہد، عمیر اقبال عمیر، جاوید پنچھی، علی حسن کھوکھر، منیر خاں شیروانی، ڈاکڑ انوار احمد تے ماسٹر عابد علی سن۔ جہناں نے اپنے اپنے ڈھنگ نال پنجاب دی ونڈ بارے ہوئی سیاست، اس دا دھرو اور انساناں دے قتلام بارے وِچار سانجھے کیتے۔ سب سجناں نے الیاس گھمن جی نوں ونڈ والی ایس وڈی گَھٹنا وَاپرن اُتے کہانیاں اَکٹھیاں کرن دی سلاہنا کیتی۔
سب توں وڈا کم ایس کتاب دا ایہہ ہے کہ ایس وچ کسے وی اک پَکھ (مذہبی، سیاسی یا سماجی) توں کہانیاں نہیں جوڑیاں گئیاں بلکہ ایس وچ ہر دھرم، فرقے، نظریے اور طبقے دے نکتہ نظر نال لوکائی تیک ونڈ دا پورا منظر اپڑان دی کوشش کیتی گئی اے تاکہ پڑھن ہار آپ نتارا کرن کہ سچ کیہ سی تے جھوٹھ کیہ اے؟ جے سِکھاں ظلم کیتا اے تے مسلماناں وی گھٹ نہیں کیتی جے ہندو ظالم سن تے عیسائیاں وی ایس چ اپنا حصہ ضرور پایا اے۔ غلط کیہ اے تے صیح کیہ، ایس گل دا ویروا تے تریخ دا طالب علم ای کرے گا پر الیاس گھمن جی کہانیاں رائیاں پورا سچ اگیڑن دی پوری کوشش کیتی اے اور ایس وچ پوری دنیا وچ جو جو ونڈ بارے پنجابی کہانی لکھن والے جی سن اوہناں دیاں سب کہانیاں شامل کرن دا پورا آہر ایس کتاب وچ کیتا گیا اے۔
ایہہ کتاب ہن تک دنیا چ کہانیاں دی سب توں وڈی کتاب اے جیس دے ہر پراگے دا اک ہزار صفحہ اے جس نوں سودھن تے چھاپن تک دا سارا کم الیاس گُھمن جی نے سِرے چاڑھیا اے۔ مَان جُوگ گل ایہہ ہے کہ اس کتاب دے 3 والیم ہور آنے باقی نیں۔ ایہہ کہانی پراگے الیاس گھمن جی اپنی سَتھ پنجابی زبان تحریک تے پنجابی ورثا پاکستان ولوں مفت پنجابی لکھاریاں تے پڑھیاراں تیک اپڑا رہے نیں۔
شیخوپورہ توں آئے لوک گائیک، بابا گروپ دے موڈھی اسلم بائو جی نے اَکٹھ وچ وارث شاہ، بلھے شاہ، سلطان باہو، میاں محمد بخش تے بابا فرید دا کلام گا کے سماں بنھ دیتا۔
اخیر تے چئرمین سانجھا ویڑھا نذیر جوئیہ جی نے سب سجناں دا شکریہ ادا کیتا اور آکھیا کہ ایس طرح دیاں کتاباں دا آون اور چھپن ساڈے پنجابی ساہت وچ اک وڈا وداھا اے۔ سانجھا ویڑھا اِنج دا سچجا کم کرن والے پنجابی پیاریاں نوں ہمیش مان دیندا رہیا اے اور مزید مان دیندا رہوئے گا۔ سانجھے ویڑھے نے ہمیش ناٹک، سنگیت، گل بات، شاعری، رقص اور کتاب نال جڑ کے لوکائی دا پورا سچ اگیڑن دا آہر کیتا اے۔
تہاڈے سب دے دم دی ہر دم خیر ہووئے پیاریو !