عمران خان دا پاکستان

لکھت:اعجازعلی ساغر

2013دے الیکشن دی کمپیئن شروع ہون والی سی جہانگیر دی خوشی دیدنی سی ، سٹھ سالہ ایہہ بزرگ بوہت خوش سی مقابلہ بوہت سخت سی مسلم لیگ ن تے پیپلز پارٹی جہی روایتی سیاسی پارٹیاں میدان وچ سن پر جہانگیر دی خوشی دی وجہ ایہہ دونواں پارٹیاں نہیں سن۔ بلکے ایس دی خوشی دی وجہ اک نویں سیاسی پارٹی تے خاص کراس دا لیڈر سی اوہ تیجی سیاست جماعت تحریک انصاف سی تے عمران خان اوہ لیڈر سی جس نے سٹھ ورھے جہانگیر نوں وی جوان کر دتا سی اوہ اک پٹرول پمپ ایہہ مالی سن تے پمپ دا مالک تحریک انصاف دا ٹکٹ ہولڈر سی اوہ اوتھوں تحریک انصاف دے ٹکٹ تے ایم این اے دا الیکشن لڑ رہیا سی کمپیئن شروع ہوئی جہانگیر دے دن رات تحریک انصاف تے عمران خان دی کامیابی لئی دعاواں منگدے لنگھن لگے اوہ تحریک انصاف دیاں ریلیاں وچ نوجواناں دی طرح رقص کردے جھومدے نظر آندے اک وار میں ایہناں توں سوال کیتا کہ تسیں مینوں ایہہ دسو کہ ہر ورھے الیکشن آندے نیں پر ایس وار تسیں زیادہ پر جوش او آپ دی خوشی دیدنی اے آخر ایہناں دی خوشی دی وجہ کیہ اے تے آپ ہوری تحریک انصاف تے عمران خان نال کیہ توقعات لائے ہوئے نیں؟ چاچا جہانگیر نے ٹھنڈی ساہ بھری تے کہیا اعجاز میری سٹھ ورھے توں زیادہ عمر اے میں ایس پرانے تے روایتی سٹم توں تھک چکیا واں ایہہ جماعتاں ہر ورھے نویں منشور دے نال میدان وچ آندیاں نیں پر الیکشن جتن دے بعد بھل جاندیاں نیں ساڈا کوئی پرسان حال نہیں ہوندا۔ اوہ تھوڑی دیر چپ ہوئے تے فیر بولے ساغر مینوں کسے وی لیڈر نال کوئی ذاتی کم نہیں لینا مینوں غریب دی حیاتی پہلے وی دال روٹی کھا کے لنگھ گئی اے تے باقی وی لنگھ جائے گی یار میں چاہنا واں کہ ساڈا ملک ترقی کرے تے ایس توں کرپشن دا خاتمہ ہوئے میرے جہے عام تے غریب بندے تے امیر لئی یکساں قانون ہوئے تے جس طرح یورپی ملک ترقی کر چکے نیں ساڈا ملک وی ایہناں دی طرح ترقی کرے تے عمران خان ایہہ کم کر سکدا اے اوہ ایماندار بندا اے تحریک انصاف انشائ اللہ حقیقی تبدیلی لیائے گی تے میرے جہے عام بندا دا ایہہ خاب سچا ہوئے گا۔ خیر 2013 دے الیکشن ہوئے پر تحریک انصاف حکومت نہیں بنا سکی پر ایس دی مقبولیت وچ بے پناہ وادھا ہویا مسلم لیگ ن دا پنج ورھے دا اقتدار اختتام ول ودھ رہیا سی تے تحریک انصاف پاکستان دی مقبول ترین سیاسی جماعت بن چکی سی تے پوری دنیا 2018 دے الیکشن وچ عمران خان نوں بطور وزیراعظم ویکھ رہی سی۔ الیکن ہوئے تے تحریک انصاف نے اتحادیاں دے نال مل کے حکومت بنا لئی اج چاچا جہانگیر دا خاب دا پہلا حصہ مکمل ہو گیا سی تے ایہناں دا پسندیدہ لیڈر وزیراعظم بن چکیا سی پورے پاکستان وچ اک جوش جہی کیفیت سی کیوں جے عمران خان نے اپنے منشور وچ واضح کر دتا سی کہ اوہ کسے چور لٹیرے نوں نہیں چھڈن گے تے عام بندے دی زندگی بہتر بناواں گے اوہناں نے ریاست مدینہ دی طرز ایہہ حکومت چلان دا عزم کیتا کہ میں ایس نوں ریاست مدینہ دا ماڈل بناواں گا۔ حلف چکن دے بعد کابینہ دی تشکیل ہو چکی سی پر ایس دا کابینہ وچ اوہ چہرے وی دوبارہ آ گئے جیہڑے ہر حکومت دا حصہ ہوندے سن جنہاں نوں عوامی زبان وچ لوٹا کہیا جاندا سی خیر سب دی زبان اُتے ایہو سی کہ وزیراعظم ایماندار اے تاں کوئی ہینکی پھینکی نہیں ہوئے گی پر حالات اوہ ای رخ اختیار کرن لگے جیہڑے دوجی سیاسی جماعتاں دے ادوار وچ سن۔ وزیراعظم عمران خان تے تحریک انصاف نوں اپوزیشن دے نال نال اتحادیاں دے چونچلیاں دا وی ساہمنا سی، اوہ اکو ویلے ایہناں سارےاں نوںنبرد آزما سن۔ ویلا لنگھن لگیا عمران خان تے تحریک انصاف لئی اک اک دن اوکھا تے بھاری لنگھ رہیا سی۔ سب توں پہلے حکومت دی اتحادی جماعت ایم کیو ایم نے حکومت توں علیحدگی دا اعلان کیتا تے وفاقی وزیر انفارمیشن ٹیکنالوجی خالد مقبول صدیقی نے وزارت توں استعفیٰ دے دتا تحریک انصاف تے عمران خان نوں ایہہ علیحدگی کسے صورت وی قابل قبول نہیں سی کیوں جے تحریک انصاف نوں الیکشن وچ بھاری اکثریت نہیں مل سکی سی چناں چے ایہناں نوں اپنے اتحادیاں دی لوڑ سی خیر جیویں تیویں کر کے ایم کیو ایم نوں منا لیا گیا پر خالد مقبول صدیقی نے دوبارہ وزارت قبول نہیں کیتی۔ ایس دوران تحریک انصاف دے اپنے وزرائ فواد حسین چوہدری تے عامر کیانی حکومت لئی درد سر بن گئے وزیر صحت عامر کیانی نوں کرپشن دے الزاماں توں بعد وزارت توں ہٹا دتا گیا جد کہ فواد حسین چوہدری دی وزارت تبدیل کر دتی گئی ایس دوران دوجے اتحادی مسلم لیگ ق یعنی چوہدری برادران تے اختر مینگل نے وی حکومت نوں اکھاں وکھانیاں شروع کر دتیاں جس دی وجہ نال تحریک انصاف تے عمران خان نوں اپنے لہجے وچ نرمی پیدا کرنی پئی تے ایس طرح ایہہ سیاسی جماعت وی ایہناں روایتی سیاسی جماعتاں دی راہ تے ٹر پئی۔ کرپشن پہلے منظم ہوندی سی ہن سر عام ہون لگی مہنگائی عروج تے اپڑ چکی سی ہن تے ایہہ حالت ہو چکی سی کہ اک عام دکاندار عمران خان تے تحریک انصاف نوں بُرا بھلا کہہ کے پجاہ دی شے 150 وچ ویچ رہیا سی ایس دوران دنیا وچ کرونا دی وبا نے جنم لیا تے ویکھدے ای ویکھدے پوری دنیا نوں اپنی لپیٹ وچ لے لیا پاکستان وی ایہناں متاثرہ ملکاں وچ شامل سی وائرس ایس قدر خطرناک سی کہ ایس نے کجھ ای دناں وچ لکھاں لوکاں نوں متاثر کر دتا تے ہزاراں لوک ایس نال لقمہ اجل بن گئے ایس خطرناک صورتحال دے پیش نظر پورے ملک نوں لاک ڈائون کر دتا گیا لکھاں پاکستانی بیروزگار ہو چکے سن چوں کے پاکستان وچ غربت دی شرح پہلے توں زیادہ اے تاں ایس لاک ڈائون نے عام بندے توں دو ویلے دی روٹی تیکر کھوہ لئی ایس دوران وزیراعظم پاکستان عمران خان نے احساس پروگرام دے ذریعے بارہ بارہ ہزار روپئے دین دا پروگرام شروع کیتا پر اوہ پروگرام وی فلاپ ثابت ہوئے تے حکومتی نااہلی واضح طور تے ساہمنے آئی۔ تحریک انصاف وی روایتی سیاسی جماعت ثابت ہوئی جیہڑی ملک توں کرپشن ختم کرن تے عام بندے دی زندگی بہتر بنان دا ویژن لے کے آئی سی پر اقتدار دے تقریباً دو ورہے لنگھن توں بعد ایسے سمت چل پئی جس اُتے دوجی جماعتاں چل رہیاں سن چاچا جہانگیر دا خواب تا حال شرمندہ تعبیر ہوندا نظر نہیں آندا ایہناں دا لیڈر عمران خان وی روایتی سیاستدان بن گیا عمران خان دے پاکستان وچ عام بندے دا جینا محال اے ایس قوم دے نال ہمیشہ کھلواڑ ہویا اے تے میں سمجھنا واں کہ ایہہ بہتر اے تاں جے ایس قوم نوں وی سمجھ لگے کہ ووٹ دا استعمال کنج کرنا اے ایہہ قوم آزادی حاصل کرن توں لے کے ہن تیکر آزادی دی کوشش کر رہی اے پتہ نہیں ایس قوم دی ایہہ جدوجہد کدوں ختم ہوئے تے اینوں رجب طیب اردگان یا مہاتیر محمد جہیا انج دا لیڈر ملے تے ملک نوں ترقی دی بلندیاں تے لے جائے وزیراعظم عمران خان تے تحریک انصاف دے کول ہجے وی ویلا اے کہ اوہ ایہناں روایتی سیاسی لیڈر تے جماعتاں دی راہ چھڈ کے حقیقی طور تے قوم دی خدمت کرن چوراں تے لٹیریاں نوں سر عام سزاواں دتیاں جان تاں جے مافیا لئی سبق ہوئے ایس توں علاوہ عمران خان نوں ملک توں کرپشن تے بدعنوانی دا خاتمہ کرنا ہوئے گا جس نے ایس ملک دیاں جڑاں کھوکھلیاں کر دتیاں نیں جائز کم لئی وی رشوت دینی پیندی اے تے فیر وی کم لٹک لٹک کے ہوندا اے۔ امیر تے غریب لئی یکساں قانون لاگو کرنا ہوئے گا ایس لئی کسے دی پرواہ کیتے بغیر سخت فیصلے لینے ہون گے سستے تے فوری انصاف دی فراہمی نوں یقینی بنانا ہوئے گا تاں جے کسے نوں
ایہہ نا کہنا پئے کہ میں تہاڈے توں آخرت وچ بدلہ لواں گا۔ پارلیمنٹ وچ ایہہ قانون پاس کروانا ہوئے گا کہ جیہڑا سرکاری افسر کسے عام بندے دا کم روکے گا یا تاخیری حربے استعمال کرے تے ایس نوں فی الفور نوکری توں فارغ کر کے ایس دی تھاں نواں بندا بھرتی کیتا جائے گا ایس قانون دا اطلاق پورے ملک لئی ہوئے گا تاں جے سرکاری افسر نوں ایہہ ڈر رہے کہ میں کم کراں گا تے نوکری اُتے رہواں گا۔پاکستان دے ہر ضلعے وچ اک کمپلین باکس بنایا جائے گا جس وچ ایس ضلعے دے شہری اپنی اپنی کملین گل سکن گے اوہ کمپلین باکس ہر مہینے وزیراعظم ہائوس وچ کھلیا کرے گا ایس طرح صوبائی تے ضلعی حکومتاں دی کارکردگی دا پتہ چلدا رہوے گا جس صوبے وچ زیادہ کمپلین ہون اوتھے دے وزی ر اعلیٰ تے جس ضلعے وچ کمپلیکن ہون اوتھے دی ضلعی انتظامیہ دے نال نال سیاسی ورکراں نوں فارغ کر دتا جائے ایہہ بظاہر اک اوکھا عمل اے پر ایس عمل نال ملک توں کرپشن دا خاتمہ ہو جائے گا کیوں جے جس افسر دے خلاف کمپلین ہوئے گی اینوں ایس گل دا ڈر ہوئے گا کہ نوکری توں فارغ ہون دے نال نال سرعام سزا وی دتی جائے گی۔ جس دن ایس طرح دے اقدامات شروع ہو گئے ملک آپے ای ترقی دی راہ تے گامزن ہو جائے گا۔ عمران خان انج دے اقدامات شروع کر کے پوری قوم دے محسن بن جان گے کیوں جے جس دن ایہہ ملک کرپشن فری ملک بن گیا ایس دن توں ایس دی ترقی دا سفر شروع ہوئے گا نہیں تے فیر چاچا جہانگیر دے ایہناں لفظاں دا سہارا لیا جائے گا کہ سٹھ ورھے انج ای روایتی سیاست وچ گزار دتے اسیں تے ساڈی نسلاں فیر روشن پاکستان نوں ترسن گیاں۔