دہشت گردی دے پچھے بھارت دا ہتھ اے !

لکھت:شاہد ندیم

پاکستان اللہ پاک دی طرفوں اک تحفہ اے، دشمن لکھ کوششاں وی کر لوے، پر ایہناں نوں منہ دی کھانی پئے گی تے اوہ کدی وی اپنے مضموم مقصد وچ کامیاب نہیں ہون گے۔ پاک فوج نے عوام دے تعاون نال دہشت گرداں دی کمر توڑ دتی اے پر دہشت گرداں دے باقیات پائیدار امن نوں خراب کرن لئی متحرک نیں، اوہ گاہے بگاہے موقع ملن اُتے دہشت گردی دی کاروائیاں کردے رہندے نیں۔ ایس حوالے نال ملک دی تجارتی سرگرمیاں دی شہ رگ کراچی اسٹاک ایکسچینج نوں دہشت گردی دا نشانہ بنان دی مذموم کوشش کیتی گئی، پر پلس تے سکیورٹی گارڈاں نوں شاباش کہ جنہاں دی ہمت، مستعدی تے چابک دستی نے خطرناک اسلحے نال لیس دہشت گرداں نوں جان دی بازی لا کے داخلی راہ داری وچ ای ڈھیر کر دتا تے ایہناں نوں اپنا خونی کھیڈ نہ کھیڈن دتا، ایس حملے دی ذمے داری بلوچستان لبریشن آرمی (بی ایل اے) نے قبول کر لئی اے، ایس توں صاف ظاہر اے کہ دہشت گردی دی ایس کاروائی وچ بھارت دی پشت پناہی دا عمل دخل تے خطے وچ پاکستان تے چین ای ایہناں دا ہدف نیں ۔
ایہہ امر واضح اے کہ مقبوضہ کشمیر وچ بھارتی مظالم دے خلاف پاکستان دی طرفوں کشمیری عوام دی دلیرانہ اخلاقی تے سفارتی حمایت تے لداخ وچ چین نال فوجی ہزیمت دی وجہ نال بھارت تلملا رہیا اے۔تاں ایس دے کول اپنی ہزیمت لُکان دا کوئی راہ نہیں، ایس لئی پاکستان تے چین دے خلاف اپنے مہریاں نوں ورت رہیا اے۔ بھارت دی بلوچستان وچ چینی باشندیاں دی بس، کراچی وچ چینی قونصل خانے تے گوادر وچ اک وڈے ہوٹل اُتے حملے کر چکے نیں۔ ایس تنظیم دے دہشت گرد اکو ویلے پاکستان تے چین دے مفادات اُتے ضرب لا رہے نیں۔ حملے وچ شامل تن دہشت گرداں دی شناخت ہو گئی اے جیہڑے کیچ دے رہن والے نیں۔ بھارتی جاسوس کلبھوشن وی بلوچستان توں پھڑیا گیا سی ایہہ ساری کاروائیاں بلوچستان دے بارے وچ بھارت دے مکروہ عزائم دا ثبوت نیں۔ ملک دشمن قوتاں بلوچستان دی پسماندگی تے اوتھے دی سیاسی قوتاں دے تحفظات نوں اپنے مذموم مقصداں لئی ورت رہے نیں۔
ایس تناظر وچ ویکھیا جائے تے دہشت گرد کاروائی دا مقصد دنیا نوں ایہہ باور کران دی کوشش اے کہ بلوچستان وچ انتہا پسند عناصر طاقت پھڑ رہے نیں، کالعدم تنظیم بی ایل اے نے ایس کاروائی نوں اپنے کھاتے وچ پان دا جیہڑا اعلان کیتا اے ایس دا مقصد وی اپنی سرپرست تنظیم ’’را‘‘ نوں ایہہ یقین دلانا اے کہ اوہ ایس دے مقصد لئی سرگرم عمل اے۔ دہشت گ رداں نے جدوں کراچی وچ ای چینی قونصلیٹ اُتے حملا کیتا گیا سی تے ایس دے ڈانڈے وی بھارت دی ایجنسی ’’را‘‘ نال جا ملدے سن، ایس دا مقصد وی ایہو سی کہ پاک چائنا تعلقات خراب کیتے جان۔ پاکستان دے اسٹاک ایکسچینج نوں نشانہ بنان دا مقصد وی دہشت ودھانا نہیں، بلکے پوری دنیا دے سرمایہ کاراں نوں ایہہ پیغام دینا سی کہ پاکستان وچ کجھ وی محفوظ نہیں، حتیٰ کہ ملک دا سب توں وڈا سٹاک ایکسچینج وی دہشت گرداں دے نشانے اُتے اے۔ جے دہشت گرداں نوں اگلے اٹھ منٹ لبھ جاندے تے بالفرض اوہ سٹاک ایکسچینج دی عمارت وچ وڑ کے اوتھے موجود بندیاں نوں یرغمال بنا لیندے تے ایہہ ڈرامہ نجانے کدوں ختم ہوندا کیوں جے دہشت گرداں دے کول اسلحہ وی وافر سی تے اوہ کھان پین دا سامان وی نال لیائے سن۔ جے خدانخواسطہ انج ہوندا تے ایسے بھارت دے میڈیا نے اسمان سر اُتے چک لینا سی کہ پاکستان دہشت گرداں دی جنت اے تے سکیورٹی ادارے ایہناں نوں روکن وچ بالکل ناکام ہو چکے نیں۔
ایہہ دہشت گردی دی واردات تے سکیورٹی فورسز نے ناکام بنا دتی، تاں خود احتسابی دا تقاضا اے کہ کراچی وچ کم کرن والی خفیہ ایجنسیاں، پلس تے رینجرز دے پورے شہر وچ ودھے ہوئے سکیورٹی جال دے ذمے داراں اپنی کارکردگی دا از سر نو جائزہ لین، ایہہ تے واضع اے کہ ایہناں دہشت گرداں نے کجھ دن کراچی وچ قیام کیتا ہوئے گا، اپنے ہدف دی ریکی کیتی ہوئے گی، آخر کیہ وجہ اے کہ ایہناں دی کراچی وچ موجودگی پلس تے خفیہ ادارے توں لُکی رہی، دہشت گرد اپنے ٹھکانے توں اُٹھ کے آئی آئی چندریگر روڈ اُتے واقع اسٹاک ایکسچینج دی بلڈنگ تیکر آئے، کراچی دی مرکزی شاہراہواں توں لنگھے، چاراں نے اسلحہ تے بارود دے بیگ وی اپنے موہڈیاں اُتے بنھ رکھے سن، حیرت اے کہ اک کار وچ سوار چارے بندیاں نے پچھے بیگ لٹکا رکھے سن تے ایہناں نوں کسے تھاں وی روکیا نہیں گیا ، وہ آسانی نال سٹاک ایکسچینج دی عمارت دے مرکزی بیریئر تیکر اپڑ گئے جد کہ سکیورٹی خطرات دی وجہ نال ریڈ الرٹ سی، ایس دا مطلب ہجے مزید بہتری دی گنجائش موجود اے۔بلاشبہ اسیں دہشت گرداں دی کمر توڑ دتی اے پر ایہناں دی باقیات فیر توں منظم ہون لئی کوشاں وکھائی دیندی اے، پاک فوج تے قوم نے دہشت گردی دے خاتمے لئی وڈی قربانیاں دتیاں نیں، ہن لوڑ ایس امر دی اے کہ دہشت گرداں نوں کسے صورت منظم نہ ہون دتا جائے، دہشت گرداں ای وانگوں ایہناں دے سہولت کار وی خطرناک نیں چوں کے سہولت کاراں دی مدد دے بغیر دہشت گردی نہیں ہو سکدی، ایس لئی دونواں دے قلع قمع دی بوہت لوڑ اے۔
ایس لئی نیشنل ایکشن پلان موجود اے، ایس وچ کسے وی ضرورت دے تحت تبدیلی تے ترمیم ضرور کرنی چاہیدی اے پر ایس اُتے عمل درآمد وچ کسے قسم دی کوتاہی نہیں ہونی چاہیدی کیوں جے بھارت دی پشت پناہی نال دہشت گرداں دے باقیات متحرک ہو رہے نیں، ایہناں دا سدباب کرن لئی پاک فوج پرعزم اے تاں عام پاکستانیاں نوں وی اک وار فیر خبردار ہو کے سکیورٹی اداریاں دا ساتھ دینا ہوئے گا تاکے وطن عزیز دے دشمن عناصر دہشت گردی یا تخیرب کاری دے کسے ہور منصوبے وچ کامیاب نہ ہون۔