جنوبی پنجاب وچ انتظامی تقرریاں

لکھت:عتیق انور راجہ

پنجاب حکومت نے پہلی وار جنوبی پنجاب لئی ایڈیشنل چیف سیکرٹری تے ایڈیشنل آئی جی دی تقرریاں کر دتیاں نیں۔ ہن دسیا جا رہیا اے کہ جنوبی پنجاب لئی وکھرے توں پبلک سروس کمیشن وی قائم کیتا جائے گا۔ اونج تے جنوبی پنجاب دے ناں اُتے اک عرصے توں وڈے وڈے ناں سیاست کردے چلے آ رہے نیں پر حکومت وچ آن توں بعد اوہ سیاسی بونے اپنے علاقے دے لوکاں دی فلاح نوں انج ای بھُل جاندے نیں جویں اقوام متحدہ کشمیر دے مسلماناں دا حق خودارادیت دا وعدہ بھُلیا ہویا اے۔ خیر دسیا جا رہیا اے کہ ہن علاقے دی پسماندگی دور کرن لئی اختیارات نوں مقامی سطح اُتے منتقل کیتا جا رہیا اے۔ بوہت چنگی گل اے تے امید اے کہ جناب عثمان بزدار دی زیر قیادت ہون والی ایہناں کاوشاں دے چلدے جنوبی پنجاب تیزی نال ترقی دیاں منزلاں طے کرن لگے گا۔ امید کرنے آں کہ ایس نال علاقے وچ غریب عوام نوں صحت، انصاف تے تعلیم دے بہتر موقعے ملن لگن گے تے بوہت جلدی اوتھے دے پسماندہ علاقیاں نوں بہتر حکمت عملی نال ترقی یافتہ شہراں دے برابر لیان دا عملی مظاہرہ ویکھن نوں ملے گا۔ ریسکیو 1122توں لے کے پناہ گاہواں تیکر دے سفر وچ پنجاب نے ہمیشہ دوجیاں صوبیاں لئی مثال قائم کیتی اے ہونا تے ایہہ چاہیدا اے کہ ہن دوجے وی پنجاب وانگوں اپنے علاقے دے لوکاں دا معیار زندگی بہتر بنان لئی اختیارات نچلی سطح تیکر منتقل کرن پر افسوس انج ہونا اوکھا اے کیوں جے باقی صوبیاں وچ عوام دے حقوق دے ناں اُتے کجھ خاندان جہاز بھری بھری کے مال تے دولت بیرون منتقل کرن اُتے لگے رہے۔ ہن جے کوئی بندہ سندھ توں پنجاب آندا اے تے پنجاب دی ترقی ویکھ کے ایس دے اندر احساس محرومی پیدا ہونا لازمی امر اے ایسے طرح جے جنوبی پنجاب توں کوئ لہور آئے تے اینوں لہور دی چکاچوند روشنیاں ایہہ سوچن اُتے مجبور کر دین گے کہ ایس دے علاقے وچ کیوں ہنیریاں دا راج اے۔ اصل نقطہ ایہہ اے کہ ایس دے اپنے نمائندے جنہاں نوں اوہ ووٹ دے کے حکومتاں دا حصہ بناندا اے اوہ ای ایس دے دل وچ محرومی دا انج دا طاقتور پودا لا چکے نیں کہ اوہ بندہ ایہہ سوچ ای نہیں سکدا کہ ایس دا علاقہ پسماندہ کیوں رہ گیا اے۔محرومی دے شکار باقی صوبیاں دے لوک ایہہ منے بیٹھے نیں کہ ملک دا سارا پیسہ پنجاب اُتے تے جنوبی پنجاب والے ایہہ سمجھدے نیں کہ صوبے دا سارا بجٹ لہور اُتے لا دتا جاندا اے۔ ایہناں سادہ لوح لوکاں نوں ایہہ سمجھ نہیں آندی کہ ایہناں دے چنے ہوئے گدی نشین، وڈیرے تے جاگیردار علاقے دے سارے ترقیاتی فنڈز خورد برد کر کے اک مدت توں ایہناں دے علاقے دا سارا فنڈ آپ ہڑپ کر رہے نیں ایہناں دے نمائندے آپ تے عالیشان محلاں وچ رہندے نیں پر علاقے دے عوام نوں ملک دے باقی علاقیاں دی ترقی وکھا کے ایہناں دے احساس محرومی نوں ودھاوا دیندے رہندے نیں۔ سندھ وچ پچھلے پجاہ ورھیاں توں کسے نہ کسے طور پیپلز پارٹی دی حکومت بن دی چلی آ رہی اے پر اسیں جاندے آں کہ حکمران خاندان تے ایہناں نال جڑے وڈیریاں تے جاگیرداراں نے اپنے لئ تے ہر سہولت حاصل کر لئی پر عوام دی حالتِ زار بدلن دا ایہناں نوں کوئی احساس نہیں ہویا۔ ذوالفقار علی بھٹو ، بے نظیر تے بلاول نوں قومی اسمبلی وچ اپڑان والا لاڑکانہ شہر اج وی کسے خستہ ہال شہر دا نقشہ پیش کر رہیا اے۔تخت لہور اُتے انگلیاں چُکن وچ پیش پیش پیپلز پارٹی دے مرکز لاڑکانہ دی سڑکاں اج وی تباہ حال وکھائی دیندی اے انج پنجاب وچ وزیراعلیٰ تبدیلی دا نعرہ پتہ نہیں کیوں لگن لگدا اے تے کدی کدی تے لگدا اے کہ کجھ مسترد شدہ لوکاں دی طرفوں جان بجھ کے لفافے بھر بھر کے کجھ میڈیائی مخلوق نوں انج دا ماحول بنان دی تلقین کیتی جاندی اے کہ جے عثمان بزدار نوں تبدیل نہ کیتا تے پتہ نہیں پنجاب وچ کیہ ہو جائے پر خوشی اے کہ جناب وزیراعلیٰ عثمان بزدار صاحب اپنیاں بیگانیاں دے سارے تیر خندہ پیشانی نال جھیل رہے نیں اوہناں نے اپنے خلاف محاذ آرائی کرن والیاں دے خلاف کدی کوئی بیان نہیں دتا بلکے اوہ پنجاب دے عوام دی فلاح لئی سرگرم رہے نیں تے یقینا ایہو ایہناں دی کامیابی اے کہ اوہ مخالفین توں الجھن دے بجائے عوامی مفاد دے منصوبیاں ول دھیان دے رہے نیں۔ مرکز توں اکثر اتحادی ناراض ہون دیاں خبراں میڈیا دی زینت بن دیاں نیں پر وزیراعلیٰ پنجاب دی ایہہ وڈی خوبی کہی جا سکدی اے کہ اوہ ہر حال وچ اپنے اتحادیاں دے نال ساز گار ماحول بنائے ہوئے نیں۔
صاحبو! پنجاب جہی دھرتی دنیا اُتے ہور کوئی ہو نہیں سکدی۔ جے حقیقت دی اکھ نال ویکھیا جائے تے پنجاب ہر دور وچ پر امن تعلیم یافتہ تے قانون دا پاسدار رہیا اے تے اج وی جے ذرا دھیان نال ویکھیے تے ہر طرح دی تنقید دے باوجود پنجاب باقی صوبیاں توں کدھرے اگے اے۔