نیب اپنے اختیارات دا غلط استعمال نہ کرے، سپریم کورٹ

اسلام آباد( پنجابی میڈیا گروپ) عدالت نے حکم دتا ایکہ نیب ملزماں نوں ہراساں تے اپنے اختیارات دا غلط استعمال نہ کرے، وائٹ کالر کرائم وچ دستاویزی شواہد دینا ہندے نیں، ہر ریفرنس وچ90 ،90 روز داریمانڈ تے ظلم اے۔ سپریم کورٹ وچ نیب ملزماں دیخلاف اک توں ودھ ریفرنس دائر کرن بارے درخواستاں اُتے سماعت ہوئی، دوران سماعت جسٹس عمر عطا بندیال نے ریمارکس دتے کہ نیب ملزماں نوںہراساں تے اپنے اختیارات دا غلط استعمال نہ کرے، وائٹ کالر کرائم وچ دستاویزی شواہد دینا ہندے نیں، ہر ریفرنس وچ90،90دناں دا ریمانڈ تے ظلم اے، نیب نوں قانون دے متحت رہ کے ہی اپنا فرض نبھائے۔جسٹس مظاہر علی اکبر نے ریمارکس دتے کہ فوجداری مقدماںوچ40دناں توں ودھ ریمانڈ نہیں مل سکدا، نیب نوں ملزماں دے90دناں دیریمانڈ دا اختیار تحقیقات مکمل کرن لئی ہی دتا گیا اے، نیب تحقیقات مکمل کرکے اک ہی ریفرنس کیوں داخل نہیں کردا ؟۔نیب دے وکیل نے موقف پیش کیتا کہ ملزماں نوں گرفتار نہ کیتا جائے تے اوہ تعاون نہیں کردے، لندن وچ اک اہم سیاسی شخصیت دے خلاف دو تین ورھیاں توںمنی لانڈرنگ دی تحقیقات جاری نیں۔