مینوں عشق والے رنگ وچ رنگ دے
عاصم بخاری
مینوں عشق والے رنگ وچ رنگ دے
چاہے دکھاں نال ربا مینوں منگدے
تیرے کولوں ربا میں تے عشق ای منگدا
عشق دی ہاں منگدا تے نالے تیتھوں سنگدا
میرے نیڑے ہنجو وی نیں عشق نشانی
میں وی جگ تے لکھاں کوئی عشق کہانی
میرے دل وچ ربا عشق دی جوت جگا دے
مینوں عشق دی کوئی نشانی دنیا تے دکھلا دے
توں عشق اچ ڈب کے نبیؐ دی ذات بنائی
فیر محمدؐ سرور لئی ایہہ دنیا آپ سجائی
توں چاہندا سیں جگ نوں صورت اوہ دکھانا
جہدے بہانے چاہنا سیں توں ربا جگ بنانا
جنہیں زمیں تے آ کے سانوں عشق دے سبق پڑھائے
تیرا ہی اوس درس سنایا تیرے گون ہی گائے
کھا کے پتھر اوسؐ رقیباں دتیاں مڑ دعاواں
جے کجھ اوہؐ مونہوں کہندے ملدیاں مُڑ سزاواں
حبشی دی سن عاشق جس دے دوجے اویس کرنیؓ
دوہاں دے عشق دی جگ تے کوئی مثال نہیں ملنی
عشق دے اندر کئی روحاں نے اپنے چم لوہائے
عشق اچ سولی چڑھ کے تیرے ربا درشن پائے
چار چفیرے ایس دنیا اچ عشق دا نام اچیرا
دین دنی وچ عشق دا ربا ہے مقام ودھیرا
جہڑا بندیاں نال کرے گا ایس جگ اندر پیار
سمجھو دو جہانیں بیڑا اوہدا ہو گیا پار
عشق منگنا ہتھ بنھ تیتھوں جان ایمان دیا مالکا
عشق گورو دا توں بنا دے مینوں ربا بالکا
مچ عشق دا لا دے ربا میرے من دے اندر
جس ویلے میں ہوش اچ آواں لوکی کہن قلندر
