غزل
منصور عزمی
تھک گئے آں ہُن سِر تے چُک چُک پَنڈ اسی تے خاہشاں دی
لیکھا بدلن ٹُر پیا اے ویکھو گٹھّی چُک کے تاشاں دی
خورے میرے دیس اِچ کِس دن امن دا سورج اُگے گا
خورے کِس دن رِیت مُکے گے ایہہ بوری بند لاشاں دی
تڑکے دا اسکول گیا نہیں بوہڑیا پُتر میرا!!!
سارے پنچھی پرت پئے نے سُرخی ویکھ نماشاں دی
کُرسی اُتے بہہ کے لُٹن دیس میرے دیاں لوکاں نوں
لیڈر آپ لُٹیرے بن گئے لوڑ نہیں بدماشاں دی
عزمیؔ میرے شعراں اُتے ایویں واہ واہ کردے او!
میں تے دِل دا ساڑا کڈھیا لوڑ نہیں شاباشاں دی
