لہو دی ہولی

بابا نجمی

ساڈے لہو نال وچ بازاراں کہناں کھیڈی ہولی
ساڈے لہو دی قیمت لے کے کہناں بھری اے جھولی
کہدے کہدے پھٹ میں سیواں دباں کنہوں کنہوں
کربل ورگے منظر وچوں لبھاں کنہوں کنہوں
گینداں وانگوں کہڑے لوکاں ساڈے لوک اچھالے
جثے کلیاں پھلاں ورگے اگاں دے وچ بالے
لت کسے دی بانہہ نہ لبھے کئی نیں نین گواچے
توہیوں دس او ربا ساڈے کسراں چین گواچے
میرے شہر چ آ کے جہناں گھر گھر وین پوائے
چوکیداراں کولوں پچھو کہڑے رستے آئے
صغراں وانگوں اج ہزاراں راہ ویراں دی تکن
صبراں والا کہڑے کہڑے دل تے رکھاں ڈھکن
کہدا کہدا ماتم کریئے سوچ کے ہوئے سوگی
آپوں ٹر گئے عمراں دے لئی کر کے سانوں روگی