غزل
حنیف ساقی
قوم دیاں تقدیراں ویکھو
لٹیا دیس امیراں ویکھو
بندے ٹُکر ٹُکر کردے
کتے کھاندے کھیراں ویکھو
ٹی وی اگے بھکھیاں بہہ کے
بولدیاں تصویراں ویکھو
چور لٹیرے لیڈر بن گئے
ہوئیاں کیہ تقصیراں ویکھو
بھکھ مریداں پلّے پائی
لٹ مچائی پیراں ویکھو
دہقاناں وی کاسے پھڑ لئے
سُنجیاں ہن جاگیراں ویکھو
وچ مسیتاں قاتل وڑ گئے
ہتھاں وچ شمشیراں ویکھو
بھکھ دے پردے اندر لُکیاں
سوہنیاں‘ سسسیاں‘ ہیراں ویکھو
جہڑا خاب اقبال سی ڈٹھا
اوس دیاں تعبیراں ویکھو
عالم‘ فاضل بھکھے مر گئے
علم دیاں توقیراں ویکھو
دولت والیاں کیتا ساقی
ساڈا حال فقیراں ویکھو
