غزل
بیراجی
وڈ وڈیریاں کولوں حال میں پچھاں گا
کویں عروج نوں آیا زوال میں پچھاں گا
جس نوں اک فیصد وی اگ دا خطرہ نہیں
لکڑاں دا کہڑا اے ٹال میں پچھاں گا
اپنے ہتھیں جس دی کھل اتارنا ایں
تیرے کول اے کہڑا وال میں پچھاں گا
جندڑی دے سدھے رستے تے ٹریا سیں
کسراں ہو گئی ڈنگی چال میں پچھاں گا
اک پل وچھڑیاں موت وکھالی دیندی سی
وچھڑیاں کسراں لنگھیا سال میں پچھاں گا
وڈی مچھی جال بناں ہتھ لگ جاندی
پونگاں لئی کہڑا اے جال میں پچھاں گا
دھو کے وی نہ خوشبو جائے جس وچوں
کس دے ہتھ چوں آیا رومال میں پچھاں گا
عشقوں پہلاں مُکھ تے زردی چھائی سی
کسراں کاکو ہو گئی لال میں پچھاں گا
دینی مدرسے دے جمے جائے وی
کسراں وگڑے سارے بال میں پچھاں گا
صحت کیوں نہیں بن دی دیس دے بچیاں دی
اج بیراجی سبھ سوال میں پچھاں گا
