غزل
عمران سلیم
ٹر گئے نیں جے جاون والے کیہ کریئے
قسمت دے انداز نرالے کیہ کریئے
سارے گھر نوں جنہاں روشن کرنا نہیں
ایہو جہے مجبور اجالے کیہ کریئے
اکلاپے نے روح وچ ڈیرے لائے نیں
رولے نیں جے آل دوالے کیہ کریئے
ساڈے تے سبھ جذبے پتھر ہو گئے نیں
شام سویرے دھپاں پالے کیہ کریئے
خورے کناں پندھ اجے تک باقی اے
پیراں دے وچ پے گئے چھالے کیہ کریئے
ساڈی پیاس تے ہور ودھائی بدلاں نے
بھر گئے نیں جے دریا نالے کیہ کریئے
ساڈی سانجھ سلیم جہدے نال پے گئی اے
جے اوہ ساڈی پگ اچھالے کیہ کریئے
