نفرت نہ توں کریا کر

ارشاد کھوکھر

اج تیرا اے کل اے ساڈا نفرت نہ توں کریا کر
چڑیاں ہتھوں باز وی مردے رب سوہنے توں ڈریا کر
غرور تکبر بھیڑا ہوندا توں وی سجناں باز آ
اپنی زندگی دے وچ کوئی اک تے چنگا عمل کما
ہس کے گل وی کر لیا کر نہ ایوں بوہتا سڑیا کر
اج تیرا اے کل اے ساڈا نفرت نہ توں کریا کر
حسن جوانی کولوں توں کوئی چنگا کم اٹھا لے
شاماں نوں کوئی ساتھ نہیں لبھنا لوئے لوئے ساتھ بنا لے
غرور سمندر چھڈ کے توں وی پیار دی نہر وچ تریا کر
اج تیرا اے کل اے ساڈا نفرت نہ توں کریا کر
دید تیری دی خاطر سجناں لہوروں چل کے آنا واں
پنڈ تیرے دی گلیاں دے وچ دھکے روڑے کھانا واں
لیکھ اپنا توں جان کے سجناں ہتھ میرا توں پھڑیا کر
اج تیرا اے کل اے ساڈا نفرت نہ توں کریا کر
رب نے ایتھے تینوں گھلیا جگ وچ پیار کھلارن لئی
دھرتی جنت بن جائے ایتھے ساڈی جند سوارن لئی
کر ارشاد دے نال محبت ایویں نہ توں لڑیا کر
اج تیرا اے کل اے ساڈا نفرت نہ توں کریا کر