غزل

منصور عزمی

حالے تیِکر اوہ نکھّتِیاں آئیاں نہیں
پوہ دِیاں راتاں تت بھڑتیاں آئیاں نہیں
تُساں گنڈاسے برچھے تِکھے کر لئے نیں
پُھلاں اُتے اجے تے پَتّیاں آئیاں نہیں
میرے اَیانے بابو بننا چاہوندے نیں
میرے پِنڈ دے وچ پر بتیاں آئیاں نہیں
کَسراں من لَاں سورج رو رو ہنبھ گیا
چِھٹاں تے اسمان توں تتیاں آئیاں نہیں
جیہناں دے نال جا پیئے اَسیں غُلام سبھے
اجے بزار دے وچ اوہ نَتیاں آئیاں نہیں
جیہڑیاں آ آ لُوں لُوں میرا ٹُنبدیاں
مینوں اَجے اوہ ساہواں سَتّیاں آئیاں نہیں
عزمی سانبھ کے رکھ لاں اکھر جیہناں تے
میری سوچ اِچ اوہ پڑچھتیاں آئیاں نہیں