ذاتی مفاد دا دائرہ

مظہر برلاس

پاکستانی معیشت تباہی دے کنڈھے اُتے اے تے ایتھوں دے سیاستدان ملکی مسئلے بھُل کے کس طرح لہور اپڑ گئے نیں اوہ جو الیکشن دا مطالبہ کردے نہیں سن تھکدے کس طر حالیکشن توں نس رہے نیں اک دوجے دے خلاف سخت گلاں کرن والے مفادات دے کھیڈ وچ کس طرح اکٹھے ہو چکے نیں تے دوجے پاسے اقتدار توں باہر ہون والے اقتدار لئی کس طرح بے چین ہو رہے نیں۔ ہر کوئی ذاتی مفاد پاروں چال چل رہیا اے ایہو حال ساڈے سرکاری محکمیاں دا اے اعلیٰ ترین عہدیدار وی ذاتی مفاد دے دائریاں وچ رہندے نیں۔
چالھی پنجاہ ورھے دی کہانی نے کیہ کیہ رنگ وکھائے’ حالت ایہہ وے کہ اج پوری دھرتی کرپشن زدہ ہو چکی اے۔ اوہ جو کرپشن پھڑن والے ادارے سن چپ وٹی بیٹھے نیں۔ ورھیاں دے مشاہدے مگروں ایہ گلاں لکھ رہیا واں کہ ایتھے حکومتاں کرن والے چوری توں باز نہ آئے۔ ہر اک نے ذاتی مفاد نوں پہل دتی ملکی مفاد دا کسے نے سوچیا ای نہیں’ صاحبان اقتدار نے ایناں لٹیا کہ ساڈی معیشت کنگال ہو گئی۔ ساڈی دھرتی جو سونا اگلدی سی ساڈے سامنے بنجر ہو گئی۔ خاہش سی کہ پھُل اگدے بدقسمتی نال کنڈے اگ آئے۔ ہن ہر پاسے کنڈے کھلرے پئے نیں اوہ جہناں دے بارے خیال سی کہ پھُلاں دی حفاظت کرن گے اوہ وی کنڈے وچھان والیاں وچ شامل ہو گئے۔ سرکاری افسراں تے گل کرن توں پہلاں حکمراناں تے گل کر لیندے نیں ذاتی مفاد تے یقین رکھن والے حکمراناں نے کرپشن کیتی تے اداریاں وچ کرپشن لے آئے’ حکمراناں نے کرپشن نوں رواج دتا سگوں اک وزیراعظم تے ایہ کہندا سی کہ دوفیصد کمیشن تے بین الاقوامی سطح اُتے اے ایہدا تے میرے توں کوئی نہیں پچھ سکدا۔
ذرا سوچو جدوں تہاڈے وزیراعظم دے ایہ خیالات ہون تے ملک کیویں سدھر سکدا اے۔ دنیا دا کہڑا ملک اے جتھے اجہے خیالات رکھن والے حکمران ہون؟ ساریاں نوں پتہ اے کہ تہاڈے حکمران بیرونی دوریاں وچ مہنگیاں گڈیاں استعمال کردے نیں کنے لمے چوڑے وفد لے کے جاندے نیں’ مہنگے ترین ہوٹلاں وچ قیام کردے نیں تے فیر جی بھر کے شاپنگ وی کردے نیں۔ ایہ سب کجھ کرن ویلے اوہ اک لمحے لئی وی نہیں سوچدے کہ اوہ اوس ملک دے حکمران نیں جس ملک دی ادھی توں ودھ آبادی غربت دی لکیر توں تھلے حیاتی گزار رہی اے جتھے لوک دو ویلے دی روٹی لئی پریشان رہندے نیں۔ پاکستان دے نال عجب کہانیاں جڑیاں ہوئیاں نیں ایتھے ہر آن والا حکمران کہندا اے کہ خزانہ خالی اے فیر پتہ نہیں ایس خالی خزانے وچوں لٹ مار دا کھیڈ کتھوں رچایا جاندا اے۔ ہر نواں آن والا ساریاں غلطیاں کوتاہیاں جان والے دے پلّے وچ سٹ دیندا اے تے اپنے ذاتی مفاد دا کھیڈ شروع کر دیندا اے۔
سول بیوروکریسی نوں ویکھ لوو’ سول افسراں دے بچے بیرون ملک پڑھدے نیں’ کیہ اوہناں دیاں تنخواہواں اینیاں نیں؟ ایہناں افسراں دا طرز زندگی اوہناں دی آمدنی دے مطابق نظر نہیں آندا۔ ایتھے وی ذاتی مفاد دے دائرے نیں’ اک ڈپٹی کمشنر دے ذمے ضلع دے انتظامی معاملے نیں پر اوہ سارا دن ذاتی مفاد دا سوچدا اے۔ اک ڈی پی او دے ذمے ضلع وچ امن و امان نوں یقینی بنانا اے پر اوہ وی سارا دن ذاتی مفاد دے دوالے گھمدا اے۔ اجہی صورتحال بیوروکریسی وچ اعلیٰ سطح اُتے اے یعنی اوہناں دے ذمہ جو کم نیں اوہ ایہ کم کردے نہیں’ بس ذاتی مفاد دے دائرے چوں باہر نکلن دا سوچدے ای نہیں’ سول بیورو کریٹس لئی سزا ناں دی چیز ای نہیں۔ وڈی توں وڈی سزا اینی جہی اے کہ اوایس ڈی بنا دتا جاندا اے ایس لئی سزاواں دے نہ ہون پاروں سول افسر وگدی گنگا وچ ہتھ دھوندے رہندے نیں اوہناں دے نزدیک حرام حلال دا کوئی مسئلہ ای نہیں۔ تعمیراتی محکمیاں بارے ٹھیکیدار ایہ کہندے نیں کہ پنج فیصد تے محکمے دا سرکاری کمیشن اے کیہ حیرت دا مقام اے کہ حکومت توں تنخواہواں لین والے اپنے فرائض دی ادائیگی تے وی کمیشن لیندے نیں۔ مافیاز دا تذکرہ بڑا ملدا اے کدی تسیں چیک کرو کہ ایتھے ہر مافیا دے پچھے کدھرے نہ کدھرے سرکاری افسر ضرور نظر آن گے۔ بھاویں اوہ کراچی ٹینکر مافیا ہووے یاں پنجاب وچ ٹرانسپورٹ مافیا’ ہر مافیا دے پچھے سرکاری افسر دا ناں آندا اے۔ ایتھوں دا صنعت کار’ تاجر تے سرمایہ کار ذاتی مفاد دے بندھن وچ رہندا اے۔ ایتھے ٹیکس دین دا رواج ای نہیں’ دوجے ملکاں وچ تے کار پارکنگ تے وی ٹیکس اے ساڈے ایتھے لوک سڑکاں تے گڈیاں کھڑی کر دیندے نیں فٹ پاتھ دا تے کوئی حال ای نہیں’ یورپ تے امریکہ وچ لوک فٹ پاتھ تے میلوں چلدے نیں ایتھے انج کتھے؟ ایتھوں دے ڈاکٹرز وی علاج دے ناں تے لٹ مار کردے نیں ایتھے تعلیم تجارت بن چکی اے۔
سارے سرکاری محکمیاں وچ اعلیٰ ترین عہدیدار ذاتی مفادات دا ای سوچدے نیں۔ عدلیہ بارے نسیم حسن شاہ دا ٹی وی انٹرویو کافی اے جہدے وچ اوہ ججاں دیاں نوکریاں دے چلے جان دا ڈر دس رہے نیں۔ ساڈے وڈے وڈے اداریاں دے سربراہ کیہ کردے نیں ایہ سمجھن لئی ایڈمرل منصورالحق دا قصہ پڑھ لوو۔ یاد رکھو دنیا دے اوہو ملک اگے ودھدے نیں جہڑے ملکاں دے حکمران تے عہدیدار ذاتی مفاد دے دائرے چوںنکل کے قومی مفاد دا سوچدے نیں۔ بقول عطاء الحق قاسمی
ظلم بچے جن رہا ہے کوچہ و بازار میں
عدل کو بھی صاحبِ اولاد ہونا چاہئے