غزل
بابا نجمی
کسراں کھچاں میں تصویراں شہر دیاں
پاٹے کھدو وانگوں لیراں شہر دیاں
مینوں شہر چوں کڈھن لگیاں سوچ لیو
کون کرے گا فیر تعمیراں شہر دیاں
سُفنا وی تے پہلاں مینوں آیا سی
میں دسیاں سن فیر تعبیراں شہر دیاں
رسماں والے جد تک برج نہ توڑاں گے
روندے رہن گے رانجھے، ہیراں شہر دیاں
جہڑے شہر چ راتیں کیڑی دسدی سی
کدھر گئیاں اوہ تنویراں شہر دیاں
اوہ وی پیڑ منائوندا ایہدے ڈھٹھن تے
ہتھیں کردا جے تعمیراں شہر دیاں
رل کے پچھیے اپنے شہر دے راکھے توں
کہدی شہہ تے ہوئیاں لیراں شہر دیاں
