غزل
نصیر بلوچ
اکھاں ترلے لے رہیاں سن پیڑ لکاون لگیاں
خورے کنیاں بلھیاں چتھیاں اوہنے جاون لگیاں
خورے کیس بہانے گھر چوں باہر آئوندا ہوسیں
ککھاں کولوں ڈردا ہوسیں چٹھیاں پاون لگیاں
شالا خیر دا وسیں اوہدے دیس تے کالیا بدلا
خیر خیریت لے کے آویں پاروں آون لگیاں
نت نہیں روسا چنگا ہوندا ویکھیں پچھو تاسیں
کہندا سی اوہ رو کے دھمی شام مناون لگیاں
مینوں اپنے سر دی کوئی نہیں ایہو سوچ ستاوے
ہتھاں نوں تکلیف نہ ہووی پتھر چاون لگیاں
