غزل
حسین شاد
سینے اندر وگدا ویکھو آساں دا اک کھال پیا
یاد دی چھاویں کد تائیں بہہ کے کھیڈے دل دا بال پیا
اک واری تے میں وی اپنیاں اکھاں دے نال چمے سن
ہوراں نوں خط لکھنائیں ہن توں جہڑے ہتھاں نال پیا
بے انکھی تے ٹلے اُتے ناتھ مراداں دیندے نہیں
ہیر سیلہٹی لبھنی کوئی نہیں بے شک بیلے بھال پیا
ٹھپ کتاباں باگے بہہ کے پیار دی راس رچائونے آں
پڑھ لکھ لاں گے جھلیے آپے پرچے دین چ سال پیا
جہڑی جائیں پیار پریتاں ہس ہس گدے پائے سن
اوہ گلیاں اوہ کوٹھے جاپن ہن تے خاب خیال پیا
ایہہ ہنجو سرمایہ تیرا شاد کدے تے مکنا اے
اپنے غم نوں رنگ برنگے شعراں اندر ڈھال پیا
