غزل
عطاء العزیز
تیری میری پریم کہانی ادھا جھوٹ تے ادھا سچ اے
جہڑی ہنجواں کیتی گھانی ادھا جھوٹ تے ادھا سچ اے
پورا سچ اے ددھ اوہ جہڑا رڑکیا جاندا سرگھی ویلے
چوڑے والی بانہہ مدھانی ادھا جھوٹ تے ادھا سچ اے
پورا جھوٹ اے جے کوئی آکھے ہجر دی اگ اچ سڑ کے مرنا
لیکن ہجر وچ جینا جانی ادھا جھوٹ تے ادھا سچ اے
پورا سچ اے جہڑا چاک نوں چکر دیندا تھکدا ناہیں
باقی مٹی اگ تے پانی ادھا جھوٹ تے ادھا سچ اے
پورا سچ اے روح اوہ جہڑی زندہ رہندی مرن دے مگروں
باقی لہو تے اوہدی روانی ادھا جھوٹ تے ادھا سچ اے
پورا سچ تے چنگا ای اے ماڑا نہیں پر جھوٹ وی سارا
جس سے کارن اگ لگ جانی ادھا جھوٹ تے ادھا سچ اے
پورا سچ اے جہڑا عطاؔ دی سوچ اچ رہندا شام سویرے
ایہہ تے اوہدی غزل بنانی ادھا جھوٹ تے ادھا سچ اے
