پنجاب الیکشن معاملہ:حکومت نہیں،اللہ دی رضا لئی بیٹھے ہاں،چیف جسٹس
اسلام آباد(پنجابی میڈیا گروپ)چیف جسٹس پاکستان جسٹس عمر عطاء بندیال نے ریمارکس دتے نیں کہ ماضی نوں حکومت دے خلاف استعمال نہیں کراں گے،حکومت دی نہیں، اللہ دی رضا لئی بیٹھے ہاں۔سپریم کورٹ وچ پنجاب الیکشن اُتے الیکشن کمیشن دی نظر ثانی درخواست اُتے سماعت چیف جسٹس آف پاکستان عمر عطا بندیال دی سربراہی وچ جسٹس اعجاز الاحسن تے جسٹس منیب اختر اُتے مبنی 3رکنی بینچ نے کیتی۔سماعت دے شروع اُتے اٹارنی جنرل نے آکھیا کہ کل عدالت نے آکھیا سی الیکشن کمیشن دے کیتے گئے نکات پہلاں کیوں نہیں کیتے سن۔ دُوجا نقطہ سی وفاقی حکومت پہلاں 4،3دے چکر وچ پئی رہی، اک صوبے وچ الیکشن ہون تے قومی اسمبلی دا الیکشن متاثر ہون دا نقطہ کیتا گیا سی، اپنے جواب وچ 4/3دے فیصلہ ہون داذکر وی کیتا سی ،چیف جسٹس نے ریمارکس دتے کہ تہانوں گھبرانا نہیں چاہیدا، عدالت تہاڈی سماعت لئی بیٹھی اے، کوئی معقول نقطہ چُکیا گیا تے جائزہ لے کے فیصلہ وی کراں گے،عدالت وچ نقطہ چُکیاگیا لیکن ایس اُتے بحث نہیں کیتی گئی، کل نظر ثانی دے دائرہ اختیار اُتے گل بات ہوئی سی۔ چیف جسٹس نے آکھیاکہ ماضی نوں حکومت دے خلاف استعمال نہیں کراں گے، حکومت دی نہیں، اللہ دی رضا لئی بیٹھے ہاں، بوہت ساریاں قربانیاں دے کے ایتھے بیٹھے ہاں، تُسی اپنے ساتھیاں توں آکھو کہ ساڈے دروازے اُتے اینج دیاں گلاں نہ کرن، ایوان وچ گل بات وی سخت نہ کیتا کرن، اسیں اللہ لئی کم کردے ہاں ایس لئی چپ بیٹھے ہاںجس ہستی دا کم کر رہے نیں اوہ وی اپنا کم کردی اے۔چیف جسٹس نے آکھیا کہ تُسی صفائیاں نہ دیون عدالت صاف دل دے نال بیٹھی اے، ساڈی ہرچیز درست رپورٹ نہیں ہُندی،آکھیاگیا عمران خان نوں عدالت نے مرسڈیز دتی سی، میں تے مرسڈیز استعمال ہی نہیں کردا، پلس نے عمران خان دی مرسڈیز دا بندوبست کیتا سی، ایس گل نوں پتا نہیں کیہ توں کیہ بنادتا گیا،چیف جسٹس نے آکھیا کہ اسیں تہانوں خوش آمدید آکھیا،گڈ ٹو سی یو آکھیا۔پی ٹی آئی رہنما، وکیل و سینیٹر علی ظفر نے آکھیا کہ عدالت نے 14مئی نوں الیکشن کران دا حکم دتا سی، اوس دن الیکشن نہیں ہو سکے، عدالت نے ساریاں جماعتاں نوں نوٹس دے دتے نیں، عدالت وچ ایس ویلے تکنیکی بحث ہو رہی اے، ماضی وچ جماعت اسلامی اُتے پابندی لان دی کوشش کیتی گئی سی، ماضی وچ سپریم کورٹ کہہ چکی اے کہ تُسی کسی سیاسی جماعت اُتے پابندی نہیں لا سکدے، توڑ پھوڑ کرنا انفرادی عمل ہُندا اے ایس اُتے ایکشن لئیا جا سکدا اے، توڑ پھوڑ انفرادی عمل ہون پاروں سیاسی جماعت اُتے پابندی نہیں لائی جا سکدی، ات گردی تے انتشار پھیلان والی جماعت بارے مختلف قنون نیں، اگر پی ٹی آئی اُتے پابندی لائی گئی تے امیداے کہ سپریم کورٹ اک ہی دن وچ کالعدم قرار دیوے گی۔
