فروغ نسیم یاد رکھن ججاں دی جاسوسی تے اک حکومت ختم ہو چکی: سپریم کورٹ

اسلام آباد: سپریم کورٹ وچ جسٹس فائز عیسیٰ کیس دی سنوائی دے دوران جسٹس مقبول باقر نے حکومتی وکیل فروغ نسیم توں آکھیا فروغ نسیم صاحب ایہ گل وی یاد رکھنا اک جمہوری حکومتی ججاں دی جاسوسی کرن تے ختم ہو چکی اے۔ جسٹس عمر عطا بندیال دی سربراہی وچ دس رکنی فل کورٹ نے سماعت کیتی، جسٹس عمر عطا بندیال آکھیا تہاڈے ولوں پیش کیتے گئے سوالاں دا بغور جائزہ لیا اے پر ایہناں وچ اکثر سوال ضروری نہیں، اسیں تہانوں تفصیل نال سناں گے، پچھلی سماعت تے تسیں اے آر یو تے کجھ مثالاں دتیاں سن۔ فروغ نسیم آکھیا بنیادی سوال اے کہ کیہ جج تے قنونی قدغن سی کہ اوہ اہلیہ تے بالاں دی جائیداد ظاہر کرے، درخواست گزار دا موقف اے اہلیہ تے بچے اوہناں دے زیر کفالت نہیں، آرٹیکل 209وچ مس کنڈکٹ دی تعریف نہ کرنا دانستہ اے، ایس لئی دوجے انتظامی قوانین توں اصول لئے جان گے۔ جسٹس منیب اختر آکھیا دوجے سارے قوانین دا ماخذ آئین اے، ایس لئی بہتر ہووے گا مس کنڈکٹ دی تعریف آئین دے تحت ای ویکھی جاوے۔جسٹس مقبول باقر آکھیا جج یا اہلیہ توں جائیداداں بارے کسے نے نہیں پچھیا، فروغ نسیم آکھیا جج توں سوال دا حق صرف سپریم جوڈیشل کونسل نوں اے، جسٹس مقبول باقر آکھیا حقیقت وچ ایہ ثابت کرنا اے اہلیہ دی جائیداد ظاہر نہ کرکے جج نے قنونی تقاضا پورا نہیں کیتا، فروغ نسیم آکھیا پاناما کیس وچ نوازشریف نے ایہو آکھیا سی کہ بالاں دی جائیداد دا میرے توں نہ پچھو، ایس کیس وچ وی تناں جائیداداں دا اج تک نہیں دسیا گیا۔