غزل
حنیف ساقی
اس دور ترقی دے انداز نرالے نیں
ذہناں چ ہنیرے نیں سڑکاں تے اُجالے نیں
کِتے ریت اسیری دی کِتے دیس نکالے نیں
جمہوری کئی منظر اجے ویکھن والے نیں
اس دیس دے آگوواں نیں اتبار جما کے تے
دکھ لوکاں چ ونڈے نیں سکھ آپ سنبھالے نیں
سچ مونہہ تے آکھن دا انعام اسیری اے
اگے راتاں کالیاں سن ہن وی دن کالے نیں
صحرا دے منظر نوں کیہ نام دیاں مولا
معصوم شہیداں نیں جتھے علم سنبھالے نیں
لوکا ںدے ذہناں چوں میں کسراں نکلاں گا
کوئی کیویں بھلاوے گا کئی میرے حوالے نیں
کئی واری سوچنا واں دن چڑھسی کدوں ساقی
کئی وار بجھا کے توں بھاویں دیوے بالے نیں
