ٹیکسی والا

بشارت احمد بشارت

لوکاں دے بھار ونڈائے ٹیکسی والے نیں
کئی بھلے راہے پائے ٹیکسی والے نیں
یورپ ہووے یاں امریکہ
ایشیا ہووے یاں افریقہ
ایہدا ہر تھاں اک طریقہ
کسے دے نال نہ کوئی شریکا
جھنڈے پیار دے لائے ٹیکسی والے نیں
لوکاں دے بھار ونڈائے ٹیکسی والے نیں
رات دنے سفراں وچ رہنا
سی نہ کرنا ہر دکھ سہنا
مندے چنگے نوں جی کہنا
سُچے لوک ایہ جگ دا گہنا
پیارے دے پھُل برسائے ٹیکسی والے نیں
لوکاں دے بھار ونڈائے ٹیکسی والے نیں
سردی گرمی توں نہ ڈرنا
موسم دی سختی نال لڑنا
سکھیا جان تلی تے دھرنا
ہسدیاں رہنا ہر دُکھ جرنا
چاواں دے بوٹے لائے ٹیکسی والے نیں
لوکاں دے بھار ونڈائے ٹیکسی والے نیں
ہر پاسے نیں ٹیکسیاں بڑیاں
انتظار دیاں لمیاں گھڑیاں
سواری کرے کرائے توں اڑیاں
نال سنائے سڑیاں سڑیاں
ہر تھاں صبر وکھائے ٹیکسی والے نیں
لوکاں دے بھار ونڈائے ٹیکسی والے نیں
دن ہووے یاں ہوون شاماں
حاضر واسطے خاصاں عاماں
خدمت کردے وانگ غلاماں
ایہدی شان نوں کراں سلاماں
کئی وچھڑے لوک ملائے ٹیکسی والے نیں
لوکاں دے بھار ونڈائے ٹیکسی والے نیں
ہر اک تائیں آئو جی کہندا
سوہنی گل نال دل لٹ لیندا
ایہدا نقش دلاں وچ رہندا
میںای نہیں ہر کوئی کہندا
کئی دلاں دے تار ہلائے ٹیکسی والے نیں
لوکاں دے بھار ونڈائے ٹیکسی والے نیں
کسے وی دیس یاں شہر چ جائو
ٹیکسی والا حاضر پائو
اوہنوں اپنا گائیڈ بنائو
اپنیاں وانگوں گپ شپ لائو
بوہے دل دے کھلے رکھائے ٹیکسی والے نیں
لوکاں دے بھار ونڈائے ٹیکسی والے نیں
شہر شہر تے بستی ببستی
ایس منائی اپنی ہستی
اپنے کم دی ایہنوں مستی
کم زیادا محنت سستی
دیوے آس دے سدا جگائے ٹیکسی والے نیں
لوکاں دے بھار ونڈائے ٹیکسی والے نیں
طوفانی تے برفانی راتاں
سفر دیاں جد مشکل باتاں
گڈی بس نہ اوہدیاں ذاتاں
ہر سواری کھا گئی ماتاں
فر آ کے بھاگ جگائے ٹیکسی والے نیں
لوکاں دے بھار ونڈائے ٹیکسی والے نیں
بیمار کوئی جد چین نہ پائے
دکھاں درداں ساہ سُکائے
لمے لگن موت دے سائے
ایمبولینس وی نظر نہ آئے
فیر مردے ہوئے بچائے ٹیکسی والے نیں
لوکاں دے بھار ونڈائے ٹیکسی والے نیں
اوکھے ویلے کم ایہ آوے
مجبوراں دا ساتھ نبھاوے
ساریاں دا دردی بن جاوے
خدمت کرکے جشن مناوے
کدے پلیوں پیسے پائے ٹیکسی والے نیں
لوکاں دے بھار ونڈائے ٹیکسی والے نیں
کئی بھلے راہے پائے ٹیکسی والے نیں