غزل
امین خیال
یادے نمھو جھانیے میتھوں پچھدی کیہ ایں
سجن دیئے نشانیے میتھوں پچھدی کیہ ایں
کد توں دینی پئی ایں آسے نت دلاسے
جھوٹھا من پرچانیے میتھوں پچھدی کیہ ایں
جاننی ایں تے آہر کیوں نہیں اَوہر دا کردی
گور پریرے جانیے میتھوں پچھدی کیہ ایں
کنی دیر دھروہ پرجا نال ہوندا رہے گا
دس نیاں دیئے رانیے میتھوں پچھدی کیہ ایں
کر کے کم سچجے کھٹ لے سوبھا جگ دی
سگھڑ نیک سوانیے میتھوں پچھدی کیہ ایں
کملے ہوئے ویڑھے نوں سمجھائے کہڑا
وگڑی تند تے تانیے میتھوں پچھدی کیہ ایں
پتہ اے تینوں وی تے خیال لئی توں کیہ ایں
سوہنیے من بھرمانیے میتھوں پچھدی کیہ ایں
