غزل
سلیم دلاوری
اوکھا سی پر میری منوں ایہ وی کم سرکار کرو
نکے وڈے سبھناں تائیں اکو جناں پیار کرو
میں آں ویلا میرے منہ تے سچی گل ای رہندی اے
ہمت ہے جے تے فیر آئو مینوں وی سنگسار کرو
جہڑے بھا وی لبھا اپنا حق میں لے کے جانا ایں
میرا حوصلہ ڈھاون دے لئی ایویں نہ تکرار کرو
میں اج نویں تسلی لے کے واپس گھر ول مڑنا نیں
کتھوں دا دستور اے بیڑی آر کرو نہ پار کرو
سورج چڑھیا تے فیر کرناں ہر تھاں اپڑ جانا ایں
اپنے گھر دی جنی مرضی اچی ہور دیوار کرو
پیار پریت دا پھنڈیا ہویا ترلے لیندا پھرے سلیم
چوکھا نہیں تے دو گھڑیاں ای میرے تے اعتبار کرو
