سرحداں دے قیدی
سلیم نجمی
اکو ساڈی رہتل سی
اکو جمن ویڑھا
لال انھیری پا دتا سی
ساڈے وچ نکھیڑا
ویر دی لیک نے ونڈ دتی
ساڈی سانجھ پریت
وکھ وکھ ہو گئے جگنی ماہیے
مِٹھے مِٹھے گیت
دھرتی دیس پنجاب دی کسراں
ہو گئی ٹوٹے دو
ایدھر اودھر کسراں گئے آں
سارے کھجل ہو
ساڈے توں نیں پکھنوں چنگے
پھردے آر تے پار
اج وی ملدے اِک دوجے نوں
جِسراں مِلدے یار
لوبھاں پِٹے دانشمنداں
سانوں کیتا وکھ
اوس دیہاڑ نوں روندے پئے نیں
اج وی دِل تے اکھ
خورے کہڑے دن مُکے گی
ایہ حداں دی قید
بھوگ رہے آں نجمی جہڑی
سرحد اں دی قید
