گیت

صغیر تبسم

فیر اج رج کے چیتے آئیاں
گلاں سرحد پار دیاں
ہنجواں دے وچ ڈب گئیاں نیں
اکھاں وچھڑے یار دیاں
مٹی وچ ہی چھڈ آئے سی
کلیاں ورگے ہاسے
کر کر یاد کلیجہ پھٹدا
دیوے کون دلاسے
کس نوں دساں کس نوں پچھاں
گلاں گزرے پیار دیاں
ہنجواں دے وچ ڈب گئیاں نیں
اکھاں وچھڑے یار دیاں
اک پرچھاواں ٹالھی پچھوں
نِت ہے کول بلاوندا
اکھ دا سرمہ بانہہ دا کنگناں رو رو ترلے پاوندا
جد وی چنا جڑناں چاہواں
یاداں آن کھلار دیاں
ہنجواں دے وچ ڈب گئیاں نیں
اکھاں وچھڑے یار دیاں
کد ملاں گے دس دے ربا
پکھواں دی اس ڈار نوں
ہن تے سِر توں چک لے ربا ہجراں دی تلوار نوں
ککراں اتے بیٹھی چِڑیاں
تیرا نام چتاردیاں
ہنجواں دے وچ ڈب گئیاں نیں
اکھاں وچھڑے یار دیاں
کٹھے ساں تے سِر تے بدل
ٹھنڈیاں چھاواں کردے سی
اک دوجے لئی جیندے ساں تے
اک دوجے لئی مردے سی
فیر گواچیاں صورتاں اج
پِنڈے چھمکاں ماردیاں
ہنجواں دے وچ ڈب گئیاں نیں
اکھاں وچھڑے یار دیاں