غزل
کرم علی کیفی
تکیا چوداں دن دا چن‘ دل پھڑک پیا
پیاریاں دا دیدار اکھیاں وچ رڑک پیا
دوہاں نے اک رکھ اُتے ناں لکھیا سی
کھرچیا ناں تے رکھ دا پتا کھڑک پیا
چن جیہا سوہنا مکھڑا ویکھ کے عشق میرا
بڈھے وارے منڈیاں وانگوں پھڑک پیا
تڑف تڑف کے مر گیا کسے وی چکیا نہ
سارے آ گئے ویکھن مردہ سڑک پیا
جس دن گولی بمب دی نہ ٹھاہ ٹھاہ ہووے
اوس دن بجلی چمکے بدل کڑک پیا
نکی جہی اک گل تے پکے سنگی نے
توڑیا سنگ قدیمی ایویں بھڑک پیا
لکھدا لکھدا کدی نہ تھکیا کیفی جی
پر رُسے دے ناں تے پین وی اڑک پیا
