غزل

مجاہداقبال مجاہد

نہیں ملیا جے اوہدا پیار کوئی گل نہیں
سدا سکھی وسے اوہ یار‘ کوئی گل نہیں
چھ دیہاڑے لنگھ جاندے وچ کماں کاراں
اک اوکھی لنگھدی اے اتوار کوئی گل نہیں
موقعہ ملیا جد وی اوہنے کوئی گھٹ نہیں کیتی
میں ای آکھیا اے ہر وار کوئی گل نہیں
آکھیا جد وی کہ لے بیٹھے نیں نخرے تیرے
ہس کے بولے نیں سرکار کوئی گل نہیں
ہجر تیرے نیں بے دردا ساڈا ساڑیا سینہ
غیر دا دتا ای سینہ ٹھار کوئی گل نہیں
کیہ ہویا جے غیراں دے سی بھاگ سولّے
ساڈے لیکھاں وچ سی ہار کوئی گل نہیں
مجاہداؔ لکھیا لیکھاں دا پے جاندا جھولی
چھڈ دے ایویں سوچ وچار کوئی گل نہیں