غزل
طاہر وزیرآبادی
جوگی دے بوہے بہہ کڑئیے
گل من دی کیہ کڑئیے
جوگی دا بانا وکھرا نی
تیرا پانی تانا وکھرا نی
کوئی سبق حیا دا لے کڑئیے
جوگی دے بوہے بہہ کڑئیے
نئیں ٹکاڈیرا جوگی دا
ہے اکو پھیرا جوگی دا
نہ لکھیاں دے نال کھیہ کڑئیے
جوگی دے بوہے بہہ کڑئیے
جوگی نے جوگ جگانی ایں
ساہاں دی دھونی لانی ایں
توں جوگی دے سنگ رہ کڑئیے
جوگی دے بوہے بہہ کڑئیے
جوگی تے پرت نہ آئونا نی
توں تلیاں مل مل رونا نی
بہ وچ دلیلاں پے کڑئیے
جوگی دے بوہے بہہ کڑئیے
