غزل
اتفاق بٹ
رب دے ناں تے وڈدھے، ٹکدے
ایہہ جہے لوک کیوں نہیں مُکدے
سپ، بگھیاڑ تے ٹھونہے اندروں
وچ انساناں آ کے ڈھکدے
ایہہ جہے لوک کیوں نہیں مُکدے
اکھ دی ہچکی کیوں نہیں رُکدی
نہر لہور دی کیوں نہیں سُکدی
پاک وطن دی دھرتی تے
دہشت گرد کیوں نہیں مُکدے
کنہوں پچھے کہڑا دسے
کد آون گے ساہ کجھ سکھ دے
رب دے ناں تے وڈھدے، ٹکدے
ایہہ جہے لوک کیوں نہیں مُکدے
چانن نال اے وَیر ایہناں نوں
کوئی نہ پاوے خیر ایہناں نوں
ایہہ شیطان دے پتر سارے
چنگے لگدے غیر ایہناں نوں
خود نوں مومن آکھن والے
غیراں اگے جا جا جھکدے
رب دے ناں تے وڈھدے، ٹکدے
ایہہ جہے لوک کیوں نہیں مُکدے
وِڈھ کلام سب مسلمانی
کم، کرتوت سب حیوانی
ویکھیاں جیوں گوریلے جاپن
کردے نت نویں شیطانی
فوج آوے تے نس نس لُکدے
رب دے ناں تے وڈھدے، ٹکدے
ایہہ جہے لوک کیوں نہیں مُکدے
