غزل
اکرم شیخ
بات بنے گی اک دن لوکی آکھدے نیں
رات ڈھلے گی اک دن لوکی آکھدے نیں
جھوٹھ فریب دی بازی جتن والیاں نوں
مات پوے گی اک دن لوکی آکھدے نیں
سریں کھلوتی گونگی بولی بھور فضا
وات سنے گی اک دن لوکی آکھدے نیں
بجھدیاں اکھاں وچ کھلوتی خاب دی لو
دات بنے گی اک دن لوکی آکھدے نیں
آل دوالے کھڑیاں اُچیاں کندھاں چوں
جھات پوے گی اک دن لوکی آکھدے نیں
ریت محل تے تاج اسارن والیاں دی
ذات گھٹے گی اک دن لوکی آکھدے نیں
