توں وی آ جا

مظہر برلاس

معیشت دے ماہرین دس رہے نیں کہ ساڈی معاشی صورتحال بڑی خراب اے اک معاشی ماہر دس رہے سن کہ سٹیٹ بینک دے کول ڈالر نہیں رہے۔ معیشت دی خراب صورتحال دے چرچے نیں۔ کوئی ایہ دس رہیا اے کہ ایل سیز نہیں کھل رہیاں’ بینکاں تے اوپن مارکیٹ وچ ڈالر دی قیمت وچ بہت وڈا فرق آ چکیا اے۔ ساڈے لئی جو نجات دہندہ لبھے گئے سن اوہ تے مٹی اڑاندے پر رہے نیں۔ حالت ایہہ وے کہ جہنوں بہت وڈا معاشی جادوگر بنا کے پیش کیتا گیا سی اوہدی ساریاں ہیریاں پھیریاں نکام ہو گئیاں نیں۔ پچھلے اٹھ مہینیاں توں جو دو ماہر وزرائے خزانہ بنائے گئے اوہ دوویں اک دوجے نوں برابھلا کہہ رہے نیں۔ پتہ نہیں اوہناں نوں لیان والے کیہ سوچ رہے نیں۔ قوم تے چنگا نہیں سوچ رہی’ پاکستان ایس ویلے سیاسی عدم استحکام توں علاوہ بدترین معاشی عدم استحکام دا شکار اے۔ بدقسمتی نال معاشی جادوگر ہن وی لوکاں نوں امداد دے گورکھ دھندے راہیں بے وقوف بنان دی کوشش کر رہیا اے حالات بڑے خراب نیں۔
تسیں تاجراں توں بے شک نہ پچھو کیوں جے تاجر سیاسی ہو سکدے نیں حالاں کہ اوہناں دی درآمدات تے برآمدات رک چکی اے تسیں عام بندے توںوی نہ پچھو کیوں جے اوہ وی سیاسی ہو سکدا اے پر سرکاری ملازمین تے سیاسی نہیں ہو سکدے تے پاکستانی سفارت خانیاں تے ہسپتالاں وچ کم کرن والے لوک تے بالکل وی سیاسی نہیں ہو سکدے۔ ساڈی معاشی حالت اینی خراب اے کہ ساڈے سفارتخانیاں وچ تنخواہواں دی ادائیگی پچھلے کجھ مہینیاں توں رکی ہوئی اے۔ سب توں ودھ تکلیف دہ گل جو ایہناں سفارتخانیاں وچ دردسر بنی ہوئی اے اوہ ایہہ وے کہ ایہناں سفارتخانیاں نے جو مقامی عملہ رکھیا ہوندا اے اوہ تنخواہ نہ ملن پاروں نوکری چھڈ کے جا رہیا اے۔ ہن ایہ خبراں ٹی وی چینلز دی زینت بن چکیاں نیں۔
میں تے سادہ جیہا بندہ واں مینوں زیادہ جانکاری نہیں۔ بس میں اپنے خاندان دے جہڑے لوک سرکاری ملازمتاں کردے نیں اوہناں توں پچھیا اے کہ اوہناں نوں تنخواہواں مل گئیاں نیں یاں نہیں تے سب دا جواب نفی وچ سی۔ شاید میں ایہ وی نہ پچھدا پر ایہ نوبت ایس لئی آئی کہ اک تے ٹی وی چینلز تے ایہ خبراں آ رہیاں سن فیر میرے محلے دے دکاندار نے دسیا کہ فلاں لیڈی ڈاکٹر اک بہت وڈے وفاقی ہسپتال وچ کم کردیاں نیں ہن اوہ وکھووکھ چیزاں کلو دی تھاں پائو دے حساب نال خرید رہیاں نیں۔ اوہناں نوں تنخواہ نہیں مل رہی اوہناں دے بچے اک پرائیویٹ سکول وچ پڑھدے نیں۔ سکول والیاں نے وی اوہناں نوں کہہ دتا اے کہ جے فیس نہیں تے اپنے بچے وی لے جائو ۔ سوال ہن ایہ پیدا ہوندا اے کہ لوک ایس صورتحال وچ کیہ کرن؟ اوہ بچیاں نوں کیویں پڑھان’ بجلی تے گیس دے بل کتھوں بھرن تے فیر اپنے خاندان دے لوکاں نوں کیویں پالن؟ ساڈے گھر وچ جو مرد تے عورتاں ملازم نیں’ میں اوہناں توں مہنگائی بارے پچھدا رہنا واں’ اوہدے توں مینوں ایہ اندازہ ہوندا اے کہ ملک وچ عام لوکاں دی صورتحال کیہ اے کیوں جے جدوں اسیں باہر خاص لوکاں وچ بیٹھنے آں تے اوہ کجھ ہور ای دسدے نیں اوہ عام لوکاں دے حالات توں واقف ای نہیں ہوندے اوہناں نوں ایہ پتہ نہیں کہ 95فیصد پاکستانیاں دے اکائونٹ وچ اک لکھ روپیہ وی نہیں۔ دولت دی غیرمنصفانہ ونڈ سرمایہ دارانہ نظام دا کیتا دھریا اے۔ انج ایہدا انجام بڑا بھیانک اے کاش کسے دا انجام ول وی دھیان جاوے۔ حکومت وچ بیٹھے لوکاں نوں ذاتی فائدیاں توں علاوہ دوجی کوئی سوچ ای نہیں آ رہی۔ کسے نوں ملک دا کوئی خیال ای نہیں’ خواہشاں دا قتل ہو رہیا اے۔ خواہشاں حسرتاں وچ بدل رہیاں نیں تے حکمران اپنی ذات توں اگے دا سوچدے ای نہیں۔ اک حکومتی مشیر دو ہفتے پہلاں پریس کانفرنس وچ دس رہے سن کہ صرف کجھ فیصد انڈسٹری چل رہی اے ہن تے شاید اوہ وی بند ہو چکی ہووے’ حالات پتہ نہیں کدھر جا رہے نیں؟۔
ایہناں ساریاں خوفناک خبراں دے درمیان اک چنگی خبر ایہہ وے کہ پاکستان وچ معافی دا بوہا کھلا ہویا اے اج کل ہر دن دو چار خبراں اجیہاں ملدیاں نیں کہ کجھ لوکاں دے دل خوش ہو جاندے نیں۔ پتہ چلدا اے کہ اج فلاں دی ضمانت ہو گئی اج فلاں دا کیس ختم ہو گیا۔ فلاں فلاں مقدمیاں وچ ادارے پیروی نہیں کرن گے۔ میرے خیال وچ معافی دے ایس دروازے چوں سارے چوراں’ ڈاکوئواں تے قاتلاں نوں گزرنا چاہیدا اے ایس لئی میرے علاقے دے جنے قاتل تے ڈاکو صرف قنون دے ڈر توں ملک چوں نس گئے سن سزاواں دا ڈر اوہناں نوں گھر آن توں روکدا سی’ میری اوہناں اگے درخواست اے کہ تسیں پاکستان آ جائو’ اج کل پاکستان وچ ملزماں تے مجرماں لئی دن چنگے نیں’ میری کالے ڈاکو’ الیاسے قاتل تے منے فراڈیے اگے وی درخواست اے کہ یار توں وی آ جا’ اج کل تیرے لئی موسم بڑا سازگار اے۔ بقول وصی شاہ:
زندہ ہوں آکے دیکھ بکھر تو نہیں گیا
میں تیری بے وفائی سے مر تو نہیں گیا