غزل
حنیف ساقی
چانن میتھوں رد نہیں ہندا
دیوا چن توں ودھ نہیں ہندا
جیڈا سوہنا ہووے دوجا
اپنے یار توں ودھ نہیں ہندا
میں وی یار گواچا رہناں
میرے کول توں جد نہیں ہندا
حسن جہاں دا کھٹا کرئیے
تیرے روپ دا ادھ نہیں ہندا
تیری قامت کہڑا ناپے
خشبوواں دا قد نہیں ہندا
دھپاں نوں پگھلا چھڈیا ای
تیرا سایہ تد بد نہیں ہندا
یار وی غیرت نوں للکاراے
بد وی ایڈا بد نہیں ہندا
توں ہوویں یا ہون ہواواں
بوہے تک ہن پدھ نہیں ہندا
یار دا شکوہ رب دا شکوہ
ساقی توں ایہہ تد نہیں ہندا
