غزل
ارشد منظور
چپ دے جندرے توڑن دا ہن ویلا اے
ظالم اگے بولن دا ہن ویلا اے
بال کے دیوا ہمت والا فجر تائیں
نھیریاں وچوں نکلن دا ہن ویلا اے
اجڑ گئے آں آکھے لگ لگ لوکاں دے
اپنے گھر وچ وسن دا ہن ویلا اے
بھاویں کیوں نہ اکھاں ای چندھیا جاون
سورج ولے ویکھن دا ہن ویلا اے
گھیرا پایا اج وی سوچ پرانی نے
نویاں سوچاں سوچن دا ہن ویلا اے
اپنے گلشن وچ بہاراں ویکھاں گے
جبر دے پنجرے توڑن دا ہن ویلا اے
ارشد بھاویں سولی اتے چڑھ جائیے
سچیاں گلاں آکھن دا ہن ویلا اے
