غزل

بیراجی

رات دنے انبراں دے راہی سدھے رستے پاندا سورج
چنگا لگدا اے جد ڈب کے نویں سویر وکھاندا سورج
چانن نوں ورتا ورتا کے احسان جتاندا سورج
لوڈشیڈنگ دے گھپ ہنیرے وڈا بلب جگاندا سورج
پہاڑاں تے صدیاں دیاں جمیاں برفاں نوں پگھلاندا سورج
کنبدیاں ٹھریاں جثیاں نوں وی سیتاں وچ گرماندا سورج
دھرتی اُتے نت فصلاں نوں دیندا رہندا نویں حیاتی
اللہ دے حکماں نال سبزی میرے پھل پکاندا سورج
پنڈاں شہراں دا جاتک ہن راتاں نوں جگنو نہیں لبھدا
اوہ پجرے وچ دھپ نوں پا کے اپنا نواں اگاندا سورج
رات دی کالخ نوں اوہ چٹے دن دے وچ بدل دیندا اے
میرے دیس دا سائنسی کاماں بلباں وچ سجاندا سورج
رکھاں دے پتیاں توں مٹی لہہ جاندی اے مینہ دے پاروں
برساتاں وچ بدلاں اولھے دھرتی خوب سجاندا سورج
اپنے آل دوالے دنیا گھڑی دی سوئی وانگ گھماوے
ساری دنیا روشن کر کے اپنا آپ وکھاندا سورج
چٹے دن دیاں آساں لے کے منزل ولے ٹریا رہندا
گھپ ہنیریاں وچ بیراجیؔ روشنیاں ورتاندا سورج