غزل
قیصرمحمودگورایہ
دُھپے ہریاں لگراں سُکنے پئیاں نیں
لگداے مِریاں سدھراں سُکنے پئیاں نیں
جاون والے کِتھے جھوک وسا لئی اے
راہواں دے وچ نظراں سُکنے پئیاں نیں
خورے نتھ کدوں جُرماں نوں پینی اے
اخباراں وچ خبراں سُکنے پئیاں نیں
آزادی دا سورج کِسلے چڑھنا اے
وچ کشمیر دے فجراں سُکنے پئیاں نیں
دردی نظر توجہ دی کد پینی اے
چیکدیاں دُکھ غزلاں سُکنے پئیاں نیں
قیصرؔ آپو اپنی جان بچاون لئی
ظلماں اگے نسلاں سُکنے پئیاں نیں
