محمد علی درانی نے پہلے مرحلے دی کامیابی دے بعد شفاف الیکشن دے انعقاد لئی فارمولا پیش کر دتا

میری تجویز اے قومی ،صوبائی اسمبلیاں دے نال بلدیاتی الیکشن وی ہون جس نال دھاندلی نہیں ہو سکے گی
چیئرمین پی ٹی آئی وی ٹکرائو نہیں چاہندے ، واضح کر دیاں ہن کسی دی لڑائی نہیں ہوئے گی، لڑائی پان دی خواہش پوری نہیں ہوئی
میاں صاحب نوں پیغام دتا ایس ویلے ٹکرائودابیانیہ اختیار نہ کرن تے اونہاں نے مہربانی کیتی اے، سابق وزیر اطلاعات و نشریات دی گل بات
لہور(پنجابی میڈیا گروپ)سابق وفاقی وزیراطلاعات و نشریات محمد علی درانی نے اعتماد سازی لئی اقداماں دے پہلے مرحلے دی کامیابی دے بعد شفاف الیکشن دے انعقاد لئی فارمولا پیش کردیاں ہویاں آکھیا اے کہ میری تجویز اے کہ قومی تے صوبائی اسمبلیاں دے نال بلدیاتی الیکشن وی ہون جس نال دھاندلی نہیں ہو سکے گی، پی ٹی آئی دے نال کھڑے رہنماواں نے آکھیا اے کہ اوہ ٹکرائو نہیں چاہندے ،دسیا گیا اے کہ چیئرمین پی ٹی آئی وی ٹکرائو نہیں چاہندے ، واضح کر دیاں ہن کسی دی وی لڑائی نہیں ہوئے گی ، میاں صاحب نوں پیغام دتا اے ایس ویلے ٹکرائو دا بیانیہ اختیار نہ کرن تے اونہاں نے مہربانی کیتی اے،لڑائی پان والیاں دی خواہش سی کہ لڑائی ہوئے لیکن اینج نہیں ہویا تے ہن ایہ نہیں ہوئے گی تے کسی دی وی نہیں ہوئے گی، کجھ سیاسی ذہن ایہ چاہ رہے سن کہ جیہریاں قوتاںغیر جانبدار رہنا چاہندیاں نیں اونہاں نوں اپنے ذاتی مفاداں لئی پھسا لین ، اوہ اونہاں نوں جانبدار بنا رہے سن لیکن ہن اوہ گیم ختم اے۔ اک انٹر ویو وچ اونہاں نے ملک وچ مفاہمت لئی اعتماد سازی دے پہلے مرحلے دی کامیابی دے حوالے نال سوال دے جواب وچ آکھیا کہ اگر تسی 15 توں20دناں دا محول ویکھو تے ملک دے محول وچ اک تبدیلی محسوس ہو رہی اے ،ہن لوگ ٹکرائو تے نفرت دی بجائے مفاہمت دی گل بات کر رہے نیں، کجھ 2دن پہلاں آرمی چیف دا بیان آیا جس وچ اونہاں نے مل کے ایس ملک نوں اگے ودھان دی گل کیتی ۔اونہاں نے آکھیاکہ میں بوہت زیادہ مطمئن ہاں ، مینوں خوشی اے کہ سیاسی جماعتاں جیہڑیاں شدید رویے اختیار کر رہیاں سن اونہاں نے اپنے روئیاں وچ نرمی دارجحان پیدا کیتا اے۔