عمران خان بزدل اے؟

اشرف شریف

عمران خان بزدل اے‘ پولیس تے رانا ثناء اللہ دے ڈر توں گھر وچ لک کے بیٹھا اے۔ لوک عمران خان نوں رد کر چکے نیں۔ عمران خان عدالتاں دا لاڈلا اے‘ وغیرہ وغیرہ۔ ایہ اوہ لوک کہہ رہے نیں جہناں نے عمران خان تے سو دے نیڑے ایف آئی آر درج کروا دتیاں تے جہناں تے عمران خان اپنے اُتے قاتلانہ حملے دا الزام لاندے نیں۔ عمران خان دی سیاست نوں اسے یاں نوے دے عشرے دی سیاسی لغت دے نال نہیں پڑھیا جا سکدا۔ اوس زمانے وچ نوازشریف تے اوہناں دے ساتھی سیاست نوں مدھن لئی پوری طرح آزاد سن۔ بینظیر بھٹو ہمیشہ رنج رہندیاں۔ نوازشریف کدی اوہناں دی کردارکشی کراندے کدی اوہناں دے شوہر دیاں سرگرمیاں نوں دس پرسنٹ دا ناں دیندے۔ بینظیر بھٹو نوں سکیورٹی رسک وی نوازشریف نے کہیا۔ اوہ بینظیر بھٹو نوں جلسیاں وچ ایہ عورت کہہ کے پکاردے‘ ہن اوہناں دی صاحبزادی تے صاحبزادی دے ماتحت ایہو کجھ کر رہے نیں‘ سگوں نوازشریف توں ودھ‘ پیپلزپارٹی عام لوکاں دی جماعت سی۔ بینظیر بھٹو سوشلسٹ کانفرنس افریقی ملکاں دی تنظیم ترقی پذیر ملکاں دے اجلاساں تے عالمی طاقتاں دے سامنے اپنی جمہوری دانشمندی دا بھرواں مظاہرہ کردیاں۔
بین الاقوامی اجلاساں وچ وڈے وڈے لیڈر اوہناں نوں حیرانی نال ویکھدے۔ اوہ دنیا وچ پچھان رکھدیاں سن۔ اوہناں دے مقابلے وچ نوازشریف گمنام جہے سن۔ صرف کجھ عرب ملک تے بھارت اوہناں نوں پچھاندے سن۔ نوازشریف دی کوئی نظریاتی تربیت سی نہ اوہ بین الاقوامی تعلقات نوں سمجھدے سن۔ اوہناں نوں صرف عرب ملکاں نال تعلق دا سبق پڑھایا گیا سی اوہناں دے خارجہ تعلقات افغان جہاد دے سیاسی رابطہ توں علاوہ کجھ نہیں سن۔ لین دین جو وی کیتا اوہناں ملکاں نال کیتا جو افغان جہاد وچ شامل سن۔ اوہناں دے کول جنگ دے بعد دی ملک دی تعمیر دا کوئی ایجنڈا نہیں سی۔ اک صاحب نے سی پیک دا مشورہ دتا چنگا منصوبہ سی‘ خارجہ تعلقات وچ کیتیاں غلطیاں سدھارن دا موقع پیدا ہو گیا سی۔ سی پیک نوں ملک لئی مفید بنان دی تھاں اوہدے توں سیاسی فائدہ اٹھان دا سوچیا‘ اورنج ٹرین تے میٹرو بس نوں اوہدے کھاتے وچ پا دتا۔ جتھے کم ہونا سی اوہ صنعتی زون ہن تک ویران پئے نیں۔ زرعی ترقی تے کم نہ ہون دتا‘ اوہناں دے زمانے وچ کپاہ دی کاشت گھٹ ہوئی تے ٹیکسٹائل ملاں دی پریشانی ودھی۔ پچھلے دس مہینے توں اوہناں دی جماعت سی پیک تے کوئی کم نہیں کر سکی۔ بس لوہے دے چنگے کارخانہ دار سن جو مطلوبہ قابلیت لوکاں نوں اپنے آل دوالے اکٹھے رکھدے۔ ایس طرز کار نے اوہناں نوں ہمیشہ پرچی دا محتاج بنا دتا۔ دہشت گردی خلاف جنگ جاری سی۔ امریکی ڈرون جہاز پاکستان دے قبائلی علاقیاں تے آئے دن میزائل سٹدے تے اکثر معصوم شہری مردے۔ اوس ویلے مسلم لیگ تے پیپلزپارٹی اقتدار وچ آئیاں پر ڈرون حملیاں تے رتی برابر احتجاج نہ کیتا۔ عمران نے ریلی کڈھی‘ قبائلی علاقیاں تک گئے‘ ہمیشہ توں سیاستداناں توں دور رہن والے قبائلی علاقیاں نوں پہلی واری کسے نے اپنایا تے عمران خان دی حمایت ودھن لگی۔ دہشت گردی خلاف جنگ دوران کے پی کے بری طرح متاثر ہویا تے عمران خان نے ایتھوں دے لوکاں نوں بھاویں کجھ نہ دتا پر اوہناں دا دکھ محسوس کیتا۔ ایہدا اوہناں نوں صلہ ملیا‘ ہر الیکشن وچ نویں پارٹی دی حکومت بنان والا کے پی کے دو واری پی ٹی آئی منتخب کر چکیا۔ آثار دسدے نیں کہ تحریک انصاف اوتھے تریجی واری وی حکومت بنا لوے گی۔ ایہ پالیسی اوس عمران خان نے اختیار کیتی جنہوں غیرسیاسی کہیا جا رہیا اے تے جہدی کامیابی نوں اسٹیبلشمنٹ دے کھاتے وچ پایا جاندا رہیا اے۔
اکتوبر 2011ء نوں مینار پاکستان دے سبزہ زار وچ جلسہ سی۔ مسلم لیگ دے رہنما پرویز رشید نے پرتکبر اندز وچ ٹی وی تے اعلان کیتا کہ عمران جلسہ گاہ وچ رکھی پنجاہ ہزار کرسیاں بھر دین تے اوہ سیاست چھڈ دین گے۔ پرویزرشید اوہی ذات شریف نیں جہناں نے سیتاوائٹ سکینڈل دے راہیں عمران خان دا 1997ء وچ الیکشن خراب کیتا۔ غرور دا سر نیواں ہویا تے کرسیاں کیہ جلسہ گاہ دے باہر دیاں سڑکاں تک بھر گئیاں۔ ایس جلسے نے تحریک انصاف نوں زندگی دتی۔ ایہدے بعد پنجاب وچ مسلم لیگ دے قدم نہ جم سکے۔ جدوں کہیا گیا کہ جناب ہن سیاست چھڈ دیو تے پرویزرشید سنے ساری مسلم لیگ نے کہیا کہ ایہ تے اسٹیبلشمنٹ نے بندے دتے۔ ہن جدوں اسٹیبلشمنٹ نوں مسلم لیگ ن اپنے نال کھڑا کردی اے تے عمران دے دوالے محافظ بن کے کون کھڑا اے۔ عام لوک۔
2013ء وچ عمران خان زیادہ سیٹاں تے جت رہے سن۔ فیر کجھ انتظامات ہو گئے۔ عمران خان ایس دھاندلی دے خلاف سڑکاں تے آ گئے۔ مولانا فضل الرحمن تے آصف زرداری نے وی دھاندلی دا اعتراف کیتا پر سیاسی مصلحت نے اوہناں نوں چپ کرا دتا۔ عمران نے چپ رہن توں انکار کر دتا۔ ایہ عام بندے دے دل دی آواز سی۔ لوک عمران خان دے نال جڑدے گئے۔ چار حلقیاں دے ووٹاں دی پڑتال دا معاملہ کھلیا تے دھاندلی نوں بدانتظامی دا ناں دے کے چھپایا گیا پر عمران دا موقف ٹھیک ثابت ہویا۔ عمران خان نے بدعنوانی دے خلاف بھرویں مہم چلائی۔ ایہ اوہناں دی اوسے جدوجہد دا نتیجہ اے کہ لوک سیاستداناں نوں سرکاری خزانے توں کوئی چیز ہڑپ کرن دی اجازت نہیں دے رہے۔ عمران خان دی وجہ نال وزیراں‘ مشیراں دے خرچیاں دی نگرانی شروع ہوئی ہن توشہ خانہ دی لٹ مار وی بند ہو گئی۔ کیہ ایہ دسن دی ضرورت اے کہ 13 جماعتاں دے جی دار مل کے اکلے عمران خان نوں ڈرا سکے کلا کر سکے تے نہ ای ہرا سکے۔ جدوں کسے طرح وی وَس نہ چلیا تے بزدلی دا طعنہ دے دتا۔ تعجب ایس گل اُتے ہویا کہ لندن وچ میاں نوازشریف اپنے پسندیدہ رپورٹراں نوں کہہ رہے سن کہ عمران خان بزدل نیں اوہ گرفتاری دین توں ڈردے نیں۔٭