رمضان دے چن مگروں ہر شے مہنگی

طلعت عباس خان

ساڈے ایتھے رمضان دے چن دے بعد ہر چیز دا مہنگی تے نایاب ہو جانا معمول اے۔ انج تے چن ہر مہینے باقاعدگی نال نکلدا اے۔ زیادہ مشہور دو چن روزیاں تے عید دا چن نیں انج تے سائنس نے بڑی ترقی کر لئی اے اگلے پنجاہ ورھے بارے پہلے توں دس سکدے نیں کہ فلاں چن کس تریخ نوں نکلے گا؟ پر اسیں مسلمان ایہناں نوں نہیں من دے تے ملک وچ چن ویکھن لئی کمیٹیاں بنا کے سینئر علماء کرام نوں دوربیناں دے راہیں چن ویکھن تے بٹھا دینے آں۔ چن ویکھن والیاں دی بصیرت تے بصارت دا اللہ ای حافظ اے۔ رات دس وجے پتہ نہیں کہدے کہن تے اعلان کردے نیں کہ چن نظر آ گیا اے۔ چن ورگا حال الیکشن کرائے جان دا اے۔ انج تے آئین و قنون دے مطابق الیکشن ہر پنج ورھے بعد ہوندے نیں پہلے توں اندازہ ہوندا اے کہ فلاں ورھے دے ایس مہینے وچ الیکشن ہون گے پر جدوں اپنے مرضی نال وقت توں پہلاں صوبائی اسمبلیاں توڑ دتیاں جان تے ویلے توں پہلاں الیکشن کرانا چاہندے ہون تے دوجے اوہ نیں جو وقت تے الیکشن کران دے خواہش مند نیں۔ اجہے حالات وچ اوہناں دے درمیان عدالتی جنگ شروع ہو جاندی اے پر جدوں کجھ معزز عادل آپ پارٹی بن جان تے فیر حالات سدھرن دی تھاں ہور خراب ہو جاندے نیں۔ ایتھے وی کجھ انج ای لگ رہیا اے جدوں حالات خراب ہوندے نیں تے ایس خرابی دے اثرات لوکاں تے سارے ملک تے پیندے نیں۔
ایس ویلے لگ ایہو رہیا اے ملک توں باہر دیاں قوتاں وی ساڈے حالات وچ دخل اندازی کر رہیاں نیں۔ جے گل گھر تک رہندی اے تے مسئلے گھر دے اندر ای حل ہو جاندے نیں پر جدوں گھر دے غیر وی حصہ لینا شروع کر دین تے فیر حالات ہور خراب ہون توں کوئی بچا نہیں سکدا۔ ملک وی اک گھر اے‘ جنہوں چلان لئی مالی امداد دی لوڑ رہندی اے۔ ایہ مالی امداد ہمیشہ توں آئی ایم ایف توں ملدی اے۔ امداد دین والے کہندے نیں جے اسیں تہاڈی مدد کرنے آں تے ساڈی گل وی منیا کرو۔ قرضہ ساڈی شرطاں تے ملے گا۔ ایس ویلے امریکہ‘ چین‘ روس دی سرد جنگ جاری اے ایس لئی امریکہ نہیں چاہندا کہ قرضہ اسیں دیئے تے چین دے نال مل کے سی پیک بنائیے۔ جد کہ چین دی خواہش تے ضرورت اے کہ اوہ پاکستان دے نال ہر پہلو تے تعلقات چنگے رکھے تاں جے سی پیک فنکشنل ہو سکے۔ کہیا جاندا اے کہ امریکہ نوں ساڈی چین نال دوستی تے کم کرنا پسند نہیں۔ جدوں سویت یونین دی جنگ افغانستان تے مسلط سی تے اسیں امریکہ دا ساتھ دتا سی تے سویت یونین نوں شکست ہوئی سی۔ کہیا جاندا سی کہ ہن امریکہ نوں پاکستان نال دوستی دی لوڑ نہیں رہی۔ ایہ دوستی اوس ویلے تک سی جدوں تک بھارت روس دا ساتھی ہوندا سی۔ ساڈے بمب توں امریکہ نے ایہ فائدہ چکیا اے کہ بھارت نوں ساڈے توں ڈرا کے روس توں وکھ کر دتا اے۔ بھارت نوں فائدہ امریکہ توں ایہ ہویا کہ اوہنوں مقبوضہ کشمیر بھارت دی پلیٹ وچ رکھ کے مل گیا۔ ہن امریکہ بھارت نال قریب تے دوستی کر چکیا اے تے اسیں ہن امریکہ دی لوڑ نہیں رہے۔ ایس صورتحال نوں ویکھ کے چین نے ساڈے نال دوستی دا ہتھ ودھایا اے پر امریکہ تے بھارت نہیں چاہندے کہ چین ساڈے نال دوستی کرے تے اسیں ترقی کریئے۔ اسیں اوہناں دے رحم و کرم تے رہیے تاں جے اسیں معاشی طور تے کمزور ہوئیے۔
ایہ تے طے اے کہ ساڈے حکمران الیکشن نال نہیں سلیکشن نال لیائے جاندے نیں فیر لوکاں تے بٹھائے جاندے نیں۔ اوہناں نوں لیان لئی جس طرح غبارے وچ ہوا بھری جاندی اے اوسے طرح اوہناں نوں وی لوکاں وچ مقبول بنایا جاندا اے۔ فیر اوہناں توں کم لے لیا جاندا اے تے اوہناں نوں ماضی دا حصہ بنا دتا جاندا اے۔ اوہ حکمران جو ایتھے لمے عرصے لئی رہندے نیں اوہناں دا حشر ویکھ لوو کہ اوہ کس طرح اگلی دنیا وچ جاندے نیں۔ جس غبارے وچ ہوا زیادہ بھردے نیں اوہدا انت وی اوناں ای خطرناک ہوندا اے۔ اک تاثر ایہ وی اے کہ ایتھے بہت سارے ادارے اشاریاں تے کم کردے نیں اپنے وڈے دی گل من دا اے۔ کم فیصلے اپنی مرضی نال نہیں دوجیاں دی مرضی نال کردا اے۔ جیویں اوس بندے نے جان اللہ نوں نہیں ایہناں نوں دینی ہووے۔ موجودہ حالات وچ وقت توں پہلاں اسمبلیاں توڑنا الیکشن وقت توں پہلے کران تے زور دینا تے آپ جدوں توں وزیراعظم توں باہر ہوئے اسمبلی وچ جانا گوارا نہ کیتا۔ ایہ وقت توں پہلاں الیکشن وچ جانا ایس لئی چاہندے نیں کہ میں جت کے اک واری فیر وزریاعظم بن جاواں جے الیکشن وچ جت نہ ملی تے رولا پان گے کہ شفاف الیکشن نہیں ہوئے فیر کیہ ہووے گا۔ ملک انارکی ول ودھے گا فائدہ اوہناں نوں حاصل ہووے گا جہناں نے غبارے وچ ہوا بھری سی۔ سپریم کورٹ نے سوموٹو لین تے کجھ ججاں نے بہت پیارا رستہ وکھایا سی کہ ویکھ لیا جاوے کہ کیہ اسمبلیاں قنون تے آئین دے مطابق توڑیاں گئیاں نیں پر اوہناں دے کہن تے کوئی سوچ وچار نہ کیتا گیا۔ پہلے ایہ آپ کہندے سن کہ امریکہ نے مینوں باہر کیتا اے روزانہ سیفر لہاندے سن کہ امریکہ نے میرے خلاف سازش کیتی اے تے فیر باجوہ دے خلاف ہو گئے ہن ایس جماعت نے پیسہ لا کے امریکن لابی تیار کیتی اے جہدے رزلٹ ہن آنا شروع ہو چکے نیں۔ امریکی مشہور شخصیت زلمے خلیل زاد نے اوہناں دے حق وچ بیان دے رہیا اے جہدی وجہ نال ہن ملک دے اداریاں نے آئین تے قنون دے مطابق کم کرنا چھڈ دتا اے عدالتاں نے حد ای مکا چھڈی اے۔ ملزم جے پہلی کال تے عدالت وچ حاضر نہیں ہوندا تے اوہدی غیرحاضری لگ جاندی اے پر ایتھے تے ملزم گھر توں اٹھ وجے اپنے لشکر دے نال نکلدا اے۔ اپنی مرضی نال ایڈیشنل دی عدالت نوں اپنے کیس دی فائل دے نال سٹاف دے نال نویں عدالت وچ شفٹ کراندا اے۔٭