صدیاں دا بیٹا انصاف دی اڈیک وچ

متلوب ورائچ

ذوالفقارعلی بھٹو نوں راہ توں ہٹان لئی جعلی مقدمے وچ پھاہے لا دتا گیا۔ ایہ زخم ہر جیالے دے دل تے ای نہیں انسانیت دے متھے تے تریخ دے سر تے وی لگا۔ اجہے مقدمے وچ عدلیہ دے کجھ کردار آمریت دے آلہ کار بن دے رہے‘ کدی جسٹس منیر دی شکل وچ کدی جسٹس انوارالحق تے مولوی مشتاق دی صورت وچ‘ میں اج مطمئن آں کہ پاکستان دی عدلیہ جسٹس عمرعطابندیال دی سربراہی وچ ماضی دی عدلیہ دی غلطیاں دا کفارہ تے قرض کسے مصلحت‘ دباء تے میڈیا ٹرائل نوں خاطر وچ نہ لیاندے ہوئے ادا کر رہی اے۔
پاکستان دی تریخ دا چار اپریل اوہ کالا دیہاڑ اے جدوں چار اپریل 1949 نوں اک فوجی آمر نے ہردلعزیز عوامی لیڈر ذوالفقارعلی بھٹو نوں رات دے انھیرے وچ اک جعلی قتل کیس دا سہارا لے کے تختہ دار تے لمکا دتا۔ ایس گھٹیا اقدام توں دو ورھے پہلاں اجہی اک سیاہ شب فوجی آمر دے سر تے جمہوریت دا خون سوار ہویا تے اوہنے شہید ذوالفقارعلی بھٹونوں اقتدار توں وکھ کرکے جیل وچ سٹ دتا سی۔ تخت توں جیل تے فیر تختہ دار تک جیالے ہتھیلی تے جان لئے گھراں توں اپنے قائد دی محبت وچ نکل پئے۔ آمر نے کسے نوں قید کیتا‘ کسے نوں کوڑے مارے تے کسے نوں پھاہے لا دتا۔ درجناں نے خودسوزی کرکے بھٹو نوں اپنی جان دا نذرانہ پیش کیتا۔ جیالے اوکڑاں برداشت کردے رہے‘ کوڑے کھادے تے پھانسیاں نال جھولدے رہے‘ اوہ شہید بھٹو نوں آمر دے آہنی پنجیاں توں تے نہ چھڑا سکے پر بھٹو دی شہادت دے بعد جمہوریت بحال کران وچ کامیاب ضرور ہو گئے۔ اوہناں نے شہید ذوالفقارعلی بھٹو دی دھی دی راہ وچ پلکاں وچھا کے اوہنوں اقتدار دے سنگھاسن تے بٹھا دتا۔ شہید ذوالفقارعلی بھٹو دی طرح اوہدی دھی نے وی جیالیاں دیاں قربانیاں نوں قدر دی نگاہ نال ویکھیا تے اوہناں دے دکھاں دا مداوا کرن دی کوشش کیتی۔ ایسے لئی جدوں محترمہ بینظیر بھٹو وی شہید ہو گئیاں تے اپنے آپ نوں شہیداں دا وارث ظاہر کرن والیاں نوں شہیداں وانگوں جیالیاں نے احترام دتا تے اوہناں نوں وی اپنی جاناں تے کھیڈ کے اقتدار تے بٹھا دتا۔ کجھ مہینے بعد ای جیالیاں تے واضح ہو گیا کہ جہناں نوں اقتدار دوایا گیا اوہ تے شہیداں دے جعلی جانشین نیں۔
قائد عوام ذوالفقارعلی بھٹو پنج جنوری 1928ء نوں لاڑکانہ سندھ وچ پیدا ہوئے۔ آپ دے والد سرشاہ نواز بھٹو مشیراعلیٰ حکومت بمبئی تے جوناگڑھ دی مسلم ریاست وچ دیوان سن۔ ذوالفقارعلی بھٹو نے 1950ء وچ برکلے یونیورسٹی کیلیفورنیا توں سیاسیات وچ گریجویشن کیتی۔ 1952ء وچ آکسفورڈ یونیورسٹی تو ںاصول قنون وچ ماسٹر دی ڈگری لئی۔ ایسے ورھے مڈل ٹمپل لندن توں بیرسٹری دا امتحان پاس کیتا۔ پہلے ایشیائی سن جہناں نوں انگلستان دی اک یونیورسٹی ساتھمپٹن وچ بین الاقوامی قنون دا استاد مقرر کیتا گیا۔ کجھ چر مسلم لاء کالج کراچی وچ دستوری قنون دے لیکچرر رہے۔ 1953ء وچ سندھ ہائیکورٹ وچ وکالت شروع کیتی۔ آپ وکھووکھ اوقات وچ صدر ایوب خان دی کابینہ وچ وزیر تجارت‘ وزیر اقلیتی امور‘ قومی تعمیر نو تے اطلاعات‘ وزیرصنعت و قدرتی وسائل تے امورکشمیر جون 1963ء توں جون 1966ء تک وزیرخارجہ رہے۔ دسمبر 1967ء وچ پاکستان پیپلزپارٹی دی نینہہ رکھی۔ 1970ء دے عام انتخابات وچ پیپلزپارٹی نے مغربی پاکستان وچ کلین سویپ کیتا۔ دسمبر 1971ء وچ جنرل یحییٰ خان نے پاکستان دی عنان حکومت جناب بھٹو صاحب نوں دتی۔ دسمبر 1971ء توں 13اگست 1973ء صدر مملکت دے عہدے تے فائز رہے۔ 14اگست 1973ء نوں نویں آئین دے تحت وزیراعظم دا حلف اٹھایا۔ 1977ء دے عام انتخابات وچ دھاندلیاں دے مبینہ الزامات دے بعد اک تحریک شروع جہدے توں ملک وچ خانہ جنگی ورگی کیفیت پیدا ہو گئی۔ 5جولائی 1977ء نوں جنرل ضیاء الحق نے مارشل لاء لا دتا۔ ستمبر 1977ء وچ بھٹو صاحب نواب محمداحمدخاں دے قتل دے الزام وچ پھڑ لئے گئے۔ 18مارچ 1978ء نوں ہائیکورٹ نے اوہناں نوں سزائے موت دا حکم سنایا۔ 6فروری 1979ء نوں سپریم کورٹ نے ہائیکورٹ دے فیصلے دی توثیق کر دتی۔ چار اپریل نوں اوہناں نوں راولپنڈی جیل وچ پھاہے لا دتا گیا۔ پھانسی دا ایہ فیصلہ عدالتی تریخ دے متنازعہ ترین فیصلیاں وچوں اک اے۔ذوالفقارعلی بھٹو دی شہادت دے بعد اوہناں دی پارٹی تریجی واری اقتدار وچ آئی تے اوہنے بعدازمرگ سگوں بعداز قتل بھٹو صاحب نوں انصاف دوان لئی صدارتی ریفرنس دائر کیتا جہنوں وچکار ای چھڈ کے اپنی آئینی مدت پوری کیتی تے چلدے بنے۔
ایہدے بعد مسلسل دعویٰ کیتا جاندا رہیا کہ اگوں اقتدار وچ آئے تے شہیدبھٹو نوں انصاف دواواں گے۔ کیس کھولاں گے‘ ہن جزوی اقتدار پی پی پی نوں مل چکیا اے۔ بلاول صاحب وزیرخارجہ نیں‘ آصف زرداری دی مرضی دے بناں شہبازشریف حکومت کوئی فیصلہ کردی اے نہ کوئی قدم چکدی اے۔ تیراں اتحادی جماعتاں دی حکومت سب کجھ کر رہی اے۔ سوائے بھٹو شہید نوں انصاف دوان تے بینظیر بھٹو دے قاتلاں تک اپڑن دے۔ بینظیر بھٹو کیس تے کروڑاں روپیے خرچ کیتے لگدا اے کہ اینے خرچے اصل قاتلاں دی پردہ پوشی لئی ای کیتے گئے نیں۔ ایہناں لوکاں نے اپنی قائد دے خون دا سودا کر لیا تے رسوا ہو گئے تے ہور رسوائیاں وی مقدر بنن گئیاں۔٭