مہنگائی دا طوفان‘ روزے دار پریشان

عقیل خان

اللہ تعالیٰ نے انسان نوں نیکی تے بدی دے دوہاں راہواں دا شعور عطا کیتا اے۔ انسان نوں نیکی دے رستے توں روکن تے برائی دے راہ نوں اختیار کران والی چیز خواہش نفس اے جہدے تے انسان دا زلی تے ابدی دشمن شیطان آسانی نال حملہ آور ہوندا اے تے صراط مستقیم توں بھٹکان دی ہر ممکن کوشش کردا اے پرجے انسان دی نفسانی خواہشات اللہ تعالیٰ دے احکام دے تابع رہن تے اوہ شیطان دے اندرونی حملے توں محفوظ رہندا اے تے جے ایہ ہدایت ربانی دے تابع نہ رہن تے فیر ایہ انسان نوں حیوانی سطح توں وی تھلے گرا دیندیاں نیں۔ خواہش نفس دے مقابلے وچ ضبط نفس دی قوت حاصل کرن لئی تے نفسانی خواہشات تے قابو پان لئی اللہ تعالیٰ نے سال وچ اک مہینہ صبح توں شام تک کھان پین توں اجتناب نوں لازمی تے فرض قرار دتا اے جہنوں ماہ صیام نال تعبیر کیتا جاندا اے۔
رمضان المبارک دا مہینہ غنیمت تے فرصت دا مہینہ اے جہدے وچ بہت ای زیادہ نفع حاصل ہوندا اے تے عقل مند تے تجارت وچ مہارت رکھن والا تاجر تے سیزن وچ ودھ توں ودھ نفع حاصل کرن دی کوشش کردا اے ایس لئی تسیں وی ایس مہینے نوں موقع غنیمت سمجھو تے نماز کثرت نال پڑھو ایسے طرح قرآن مجید دی تلاوت وی ودھ توں ودھ کرنی چاہیدی اے۔ نفل تے تسبیحات دا پڑھنا معمول بنانا چاہیدا اے کیوں جے ایس مہینے وچ اک نیکی دا ثواب ستر گنا ودھ جاندا اے۔ افسوس تے ایس گل دا اے کہ جتھے رب کائنات نیکیاں دی سیل لاندا اے اودھر ایس دنیا دے تاجرحضرات روزہ داراں تے مہنگائی دا طوفان کھڑا کر دیندے نیں۔ اپنیاں تجوریاں بھرن لئی روزہ داراں دا ڈھڈ کٹدے نیں کیوں جے اوہناں لوکاں نوں پتہ اے کہ روزہ داراں نے اپنا تے اپنے گھر والیاں نوں روزہ افطار کرن لئی پربندھ ضرور کرنا اے تے اوہ روزہ داراں دیاں مجبوریاں دا فائدہ چک کے اپنیاں تجوریاں بھر لیندے نیں۔ روزے توں دو دن پہلاں جو پھل دو سو روپیے سی اج اوہ چار سو روپیے تے اپڑیا ہویا اے۔ سبزیاں وی سو فیصد دے وادھے نال غریب دی پہنچ توں دور ہوندیاں جا رہیاں نیں۔ آٹا حاصل کرن لئی لوکاں نوں اپنیاں جاناں دا نذرانہ پیش کرنا پے رہیا اے۔ لمیاں لمیاں قطاراں وچ کھڑے ہو کے اپنے مقدر نوں ازمانا اوہ وی روزے دی حالت وچ کہ مینوںآٹا ملدا اے کہ نہیں؟ گھیو تے تیل نوں پہلاں ای غریب ہتھ لان نوں ترس رہیا اے۔ ایہو نہیں غریب بندہ جو باہروں سموسے پکوڑے سو پنجاہ روپیے دے لے آندا سی ہن اوہ وی ناممکن ہو گیا اے کیوں جے جہڑا سموسہ 30 روپیے دا سی ہن اوہ پنجاہ دا ویچیا جا رہیا اے۔ افسوس اسیں ایہناں تاجراں تے ای نہیں کر سکدے سگوں ایس توں ودھ تکلیف دی گل ایہہ وے کہ انتظامیہ وی سُتی پئی اے۔ ضلع‘ تحصیل توں لے کے مقامی انتظامیہ تک کوئی بندہ ایہناں لٹ مار کرن والیاں دے خلاف کوئی ایکشن لین نوں تیار نہیں جے زیادہ ہویا تے کسے اک کمزور تاجر نوں ہلکا پھلکا جرمانہ کر کے اپنی خبر اخبار دی زینت بنوا کے فارغ۔
تصویر دا اک رخ وکھایا اے ہن دوجا رخ وی ویکھ لوو۔ اک پاسے تے تاجراں دی گل ہو رہی اے دوجے پاسے فوڈ اتھارٹی دا کردار وی سلاہن جوگ اے۔ اکثر پنڈاں تے شہراں وچ بہت سارے دکاندار تے ہوٹل وچ اینے گھٹیا تیل یاں گھیو وچ چیز تل کے ویچی جا رہی اے کہ کھانے نوں دل نہیں کردا پر روزہ دار اپنے بچیاں دی خوشی لئی سستے دام ہون دی وجہ نال ایہناں شیواں نوں خرید کے لے جاندے نیں جہدے نال اوہ اپنے بچیاں دا روزہ افطار کراندے نیں جو اوہناں دے بچیاں دی صحت لئی نقصان دہ ہوندا اے۔ مُسیاں شیواں تے گلیاں سڑیاں چیزاں پا کے سموسے پکوڑے تل کے لوکاں نوں ویچنا معمول بن چکیا اے پر فوڈ اتھارٹی والے وی اپنا کردار ادا نہیں کر رہے۔
سوچنا ایس گل دا اے کہ انسان دی فطرت وچ دنیاداری کجھ زیادہ اے پر اللہ دے نیک بندے نیں جو اپنے رب دی رضا لئی سب کجھ کرن نوں تیار نیں شاید ایسے لئی ایہ دنیا وی اجے تک قائم اے۔ دنیا دے لالچی لوکاں نے تے اپنا ہوس پورا کرنا اے پر جو محکمے اجہے لوکاں توں بچان لئی بنائے گئے نیں اوہناں دا کردار کیہ اے؟ اوہ کتھے گواچ گئے نیں؟ ساڈے ٹیکس دے پیسیاں نال اپنیاں تنخواہواں لین والیاں لئی لازم نہیں کہ اوہ ساڈی دیکھ بھال وچ کوئی کسر نہ چھڈن پر افسوس اوہناں وچ کالیاں بھیڈاں موجود نیں جو ایدھر توں وی مال کماندے نیں۔
امت مسلمہ نوں مبارک ہووے کہ اوہناں دی زندگی وچ اک واری فیر ماہ صیام آ گیا اے خوش نصیب نیں اوہ لوک جو ایس مہینے دا شدت نال انتظار کردے نیں تے فیر پورے پربندھ دے نال روزے رکھدے نیں۔ بڑے بدنصیب نیں اوہ لوک جو ایس مہینے نوں اپنی زندگی وچ پاندے تے ضرور نیں پر اوہناں دے نصیب وچ نہ روزے ہوندے نیں تے نہ ای اوہ نیکیاں دی سیل توں فائدہ چک سکدے نیں سگوں اپنے واسطے جہنم دی اگ ہور گرم کردے نیں۔ خوش نصیب نیں اوہ لوک جہناں نے اپنی زندگی وچ ایہ مہینہ پا لیا اوہناں نوں چاہیدا اے کہ اوہ ایس مہینے توں فائدہ اٹھا کے اپنے گناہواں دی بخشش کروا لین۔ پچھلے ورھے ماہ رمضان وچ میری ماں میرے نال سی تے اج ایس رمضان وچ اوہ اپنے حقیقی مالک دے کول جا چکیاں نیں۔ پچھلے رمضان وچ اوہ اپنی آخرت لئی آپ دعا کر رہیاں سن تے اج اسیں اوہناں دی بخشش تے جنت الفردوس پان لئی دعا کر رہے آں۔٭