کجھ خط مراد سعید دے ناں

لكهت: اشرف شریف

ڈاکیا‘ اوہ کردار جہدے تے نظماں لکھیاں گئیاں۔ ڈاک بنگلہ‘ جنہوں فلماں وچ اک شاعرانہ مزاج بابو دا ٹھکانہ وکھایا جاندا۔ گانا‘ چٹھی ذرا سیاں جی کے نام لکھ دے۔ ایہ سب اک دوستانہ تے ناسٹلجیک احساس دواندے نیں۔ ہن زمانہ بدل گیا اے ڈاک دا محکمہ تے اوہدے بابو وی۔ اک مدت تک تباہ حالی رہی ہن پاکستان پوسٹ دا احیاء ہویا اے پر وگڑے معاملے ہور دھیان چاہندے نیں۔ ایہدے وچ نجی کوریئر دے معاملیاں وی شامل نیں جہناں بارے وزارت مواصلات شکایات دا جائزہ لیندی اے۔ ایس توں پہلاں کہ میں اپنا قصہ سناواں سینئر صحافی اسلم ملک صاحب تے جو بیتی اوہ پڑھ لوو۔
اوہ دسدے نیں: کوریئر سروس توںگھلیا گیا ایہ پیکٹ مینوں 9 ویں دن ملیا۔ بہانہ ایہ کیتا گیا کہ ایڈریس دا پتہ نہیں سی چل رہیا۔ حالاں کہ مینوں روزانہ ای ڈاک خانے توں گھلے گئے خط تے پیکٹ ملدے نیں تے اوہناں تے وی ایہو پتہ لکھیا ہوندا اے۔ سمن آباد موڑ انج سمجھو لہور دی ناف اے۔ سارے جان دے نیں کوریئر اوتھے اپڑ جاوے تے ممکن ای نہیں کہ اپرجنک نگر دا پتہ نہ لگے۔ اوہ موڑ توں ای شروع ہو جاندا ے کجھ عرصہ پہلے اک دوست نے مینوں کوریئر دے راہیں کتاب گھلی۔ اک ای شہر وچ دس باراں کلومیٹر دے فاصلے تے تن دن بعد اپڑی۔ وجہ ایہہ وے کہ کوریئر والیاں دا علاقہ بڑا کھلا ہوندا اے تے اوہ گلی محلے نہیں جان دے‘ ایڈریس نہیں سمجھدے۔ ڈاک توں تے تسیں بناں پیسے خرچ کیتے‘ بناں ٹکٹ لائے وی خط‘ کتاب گھل سکدے او۔ اوہ بیرنگ ڈاک زیادہ محفوظ طریقے نال اپڑے گی۔ محصول ڈاک دوگنا وصول کرن والے توں لیا جاوے گا۔ تہاڈا پوسٹ مین تہاڈے بچیاں دے نک نیم تک جان دا اے اوہنوں ایہ وی پتہ ہوندا اے کہ تہاڈی دھی یاں بھین کس شہر وچ ویاہی اے۔ تہاڈا بھائی یاں پُتر کس ملک وچ رہندا اے۔ تہاڈا سسرال تے میکہ کتھے اے۔ تسیں کتھے کم کردے او فلاں کالج یاں یونیورسٹی توں خط آیا اے تے کہدا ہو سکدا اے۔
ہن میری سن لوو: ساڈے دوست خالد لودھی صاحب نے دو مہینے پہلاں لندن توں کتاباں گھلیاں‘ اٹھ دن دے بعد پاکستان پوسٹ دی تحویل وچ ٹریس کیتیاں‘ تن ہفتے تک اوہناں دے کول رہیاں‘ مراد سعید نوں کہیا‘ اوہناں نے اپنے اک افسر نوں ہدایات دتیاں‘ فیر وی ہور تن دن لگ گئے۔ پاکستان پوسٹ والیاں دا کہنا اے ایکسائز والے ویلے سر سامان کلیئر نہیں کردے جہدے نال پاکستان پوسٹ دی کارکردگی متاثر ہو رہی اے۔ برادرم مرادسعید آپ وی مطالعہ پسند نیں تے اوہناں نوں پتہ ہووے گا کہ کتاب نال محبت کرن والیاں لئی ایہ صورتحال کنی پریشان کن اے۔
اک قاری یاسر الیاس دا کہنا اے: تجربے تجربے دی گل اے سر… میرے کجھ مہینہ وار شمار آئوندے نیں تے بذریعہ ڈاک آئوندے نیں مارچ دا شمارہ‘ اپریل شروع ہون توں دو چار گھنٹے پہلاں ای ملدا اے تے جنی شمارے دی قیمت ہوندی اے اونی لاگت دی ٹیلی فون کال ہوندی اے محکمہ ڈاک دے وکھووکھ نمبراں تے۔
اک ہور کتاب دوست دی سن لوو ذیشان حیدر کہندے نیں: سرگودھا یونیورسٹی نے میرا اپوائنمنٹ لیٹر 18 فروری نوں گھلیا جو ضلع سرگودھا وچ ای واقع میرے پنڈ جہڑا کہ سرگودھا توں صرف 50 کلو میٹر دی وِتھ تے اے اٹھ مارچ نوں اپڑیا‘ 50 کلومیٹر دا سفر 18 دن وچ طے ہویا۔ مرزا ظفراقبال دے بقول: جو نارمل ڈاک اے اوہ تے ڈاکیے دے راہیں ویلے سر اپڑ جاندی اے محکمہ ڈاک نے جو یو ایم ایس کوریئر شروع کیتی اے اوہ اک ہور ڈاکیا لے کے آئوندا اے تے اوہ بھیڑا اے‘ میرا اک دعوتی کارڈ جو ملتان توں گھلیا گیا مکتوب الیہ دستیاب نہ ہے کر کے واپس گھل دتا گیا۔
لیاقت علی وینس دی شکایت اے کہ پیکٹ نہیں اپڑدے یاں واپس آ جاندے نیں اسیں مسئلیاں دا سامنا کر رہے آں۔ ڈاک خانے دا نظام بڑا ماٹھا اے۔ اک مہینہ تے عام گل اے وی پی واپس آن وچ‘ بہت سارے پیکٹ گواچ جاندے نیں۔
نگہت سلیم کہندیاںنیں: ڈاک خانے والے اپنے ہاں ڈاک گھلن دی حوصلہ شکنی کردے نیں انٹرنیشنل ڈاک لئی تے صاف کہہ دیندے نیں کہ جی پی او جائو اک تجویز آئی اے کہ ڈاک والے نجی کمپنیاں وانگوں پرائم لوکیشنز تے مارکیٹ وچ اپنے دفتر کھولن تے تھوڑے شیشے وغیرہ وی لان عام لوک ایہدے توں متاثر ہوندے نیں۔
مظہرفاروق دی شکایت اے کہ حال ای وچ ڈی جی خان توں پاکستان پوسٹ راہیں اک رجسٹری میرے ناں کراچی گھلی۔ ٹریکنگ سروس دے راہیں پتہ لگا کہ قریبی پوسٹ آفس وچ ڈاک اپڑ گئی پر دس دن گزرن تے جدوں مطلوبہ پتے تے اپڑی تے آپ پوسٹ آفس جانا پیا۔ بے ترتیب پئے ھیر وچ مشقت دے بعد رجسٹری شدہ ڈاک ملی۔ اوہ شاعر بے مثال مجید امجد نے اپنی نظم ’’لاہور میں‘‘ کہی سی۔ ڈاک خانے دے ٹکٹ گھر تے خریداراں دی بھیڑ‘ اک چوبی طاقچے تے کجھ دواتاں‘ اک قلم میں چکیا تے خط لکھن لگا پیارے ماموں جی!
دعا کیجیے خدا رکھ لے بھرم
آج انٹرویو ہے
کل تک فیصلہ ہو جائے گا
دیکھیں کیا ہو؟مجھ کو ڈر ہے
اک ذرا تکلیف فرما کر پتہ لکھ دیجیے
میں نے تم سے وہ لفافہ لے لیا
جھجکا نہیں بے دھڑک لکھ ڈالا
میں نے کانپتے ہاتھ کے ساتھ
مختصر رنگین پتہ گلگت میں
گوہرخاں کے نام
شکریہ جی کیسا ایک ہنستی نگہ زیر نقاب
ڈاک میں خط
تانگہ ٹیمپل روڈ کو۔ قصہ تمام ٭