خدارا ملکی سلامتی نوں داء تے نہ لائو

پاکستان دی سیاست وچ ہر لمحے نویں ڈویلپمنٹ سامنے آ جاندی اے۔ ساڈی سیاست تے انج وی تلاطم خیز تے مدوجزر دی سیاست رہندی اے استحکام توں کوسوں دور رہی اے جے کدی استحکام دی امید نظر آئی تے عمل وچ آن توں پہلاں ای دم توڑ گئی۔ سیاست وچ عدم استحکام دی وجہ کجھ ہور نہیں آپ ساڈے سیاستدان نیں جو اک دوجے نوں برداشت کرن لئی تیار نہیں۔ سیاسی اختلافات نوں ذاتیات تے دشمنی تک لے جاندے نیں کئی تے اک دوجے دی جان تک لین دی حد تک جا چکے نیں۔
عمران خان نوں مات دین دی ہر ممکن کوشش کیتی گئی پر اوہناں نوں جناں دبایا گیا اوہ لوکاں وچ اونے ای پاپولر ہوندے گئے۔ پنجاب اسمبلی اوہناں دے کہن تے پرویزالٰہی نے توڑ دتی پر ایہ مرحلہ آسانی نال سر نہیں ہویا۔ کجھ قوتاں تے پنجاب وچ اپوزیشن جو مرکز وچ حکومت وچ اے اوہنے ہر حربہ اختیار کیتا پر نہ تے اوہ پرویزالٰہی دی حکومت گرا سکے تے نہ ای اسمبلی بچا سکے۔ اعتماد دا ووٹ اک بہترین حکمت عملی نال حاصل کیتا۔ عمران خان اک واری فیر مخالفاں نوں مات دے گئے۔
پرویزالٰہی اسمبلی توڑن دے حق وچ نہیں سن تے نہ ای اوہ اعتماد دا ووٹ لینا چاہندے سن پر فیر عمران خان دی ذہانت تے پرویزالٰہی دے گٹھ جوڑ وچ مہارت رکھن پاروں اعتماد دا ووٹ لے لیا گیا۔ پرویزالٰہی عمران خان نوں منا رہے سن کہ اسمبلیاں نہ توڑیاں جان پر ایس دوران عمران خان نے پرویزالٰہی نوں اسمبلی توڑن تے قائل کر لیا۔ عدالت وچ تحریک انصاف اک ای نکتے تے اڑی رہی کہ اعتماد دا ووٹ لین دی لوڑ نہیں۔ بنچ ولوں کوشش کیتی جاندی رہی کہ اعتماد دے ووٹ تے کوئی تصفیہ ہو جاوے فریقین متفق ہو جان پر پی ٹی آئی نے ایس پاسے جان توں مکمل گریز کیتا جہدے توں ایہو لگدا سی کہ پی ٹی آئی اعتماد دا ووٹ لینا نہیں چاہندی تے اوہدے کول لوگ وی پورے نہیں کیوں جے مسلم لیگ ن دی قیادت ولوں ایہ بار بار کہیا جا رہیا سی کہ اوہناں دے یاراں لوک اوہناں نوں چھڈ چکے نیں بڑے وثوق نال کہیا جا رہیا سی۔ اوسے دن پنجاب اسمبلی د اجلاس وی ہو رہیا سی۔ ایہدے وچ مسلم لیگ ن تے پیپلزپارٹی دے لوکاں دا بس اک ای مطالبہ سی کہ پرویزالٰہی اعتماد دا ووٹ لوو۔ اعتماد دا ووٹ لین دی حکمت عملی صرف عمران خان تے پرویزالٰہی دے کول سی تے اوہدے مطابق فیر ادھی رات توں کجھ پہلے عمل شروع ہو گیا۔ پی ٹی آئی دے ایم ایز نوں پارلیمانی اجلاس وچ شرکت لئی سدیا گیا سی تے کسے دے وہم و گمان وچ وی نہیں سی کہ ایہو لوک اجلاس دے نال ای اعتماد دے ووٹ لئی وی استعمال ہون گے تے فیر مسلم لیگ ن ولوں جہڑے لوکاں نوں روکیا جانا سی اوہدی وی لوڑ محسوس نہیں ہوئی۔ چار لوک دوست مزاری’ خرم لغاری’ مسعود چوہدری’ مومنہ وحید کھل کے پی ٹی آئی دی مخالفت کر رہے سن جد کہ فاروق چیمہ پارٹی نال بے وفائی کر گئے۔ پنج لوکاں نے پی ٹی آئی دا ساتھ نہیں دتا ایہدے باوجود 186 لوک ایس طرح نال پورے ہو گئے کہ اک آزاد ایم پی اے بلال وڑائچ اوہناں دے نال مل گیا سی۔ عمران خان پنجاب اسمبلی تے کے پی کے اسمبلی نوں توڑ کے انتخابات کروانا چاہندے نیں۔ اوہناں نے تے قومی اسمبلی توں وی استعفے دے رکھے سن۔ اوہناں دی خواہش اے کہ پورے ملک وچ انتخابات ہو جان پر چوداں جماعتاں پی ڈی ایم ایس پاسے نہیں سن آ رہیاں پر ہن صورتحال کجھ ہور بن دی ہوئی نظر آ رہی اے تبدیلی دیاں ہواواں چل پئیاں نیں۔ پنجاب اسمبلی ٹٹ چکی اے’ کے پی کے اسمبلی وی اوسے راہ تے چل پئی اے تے فیر مرکز وچ پی ڈی ایم دی حکومت اوہ وی ڈگمگا تے کنب رہی اے اوہدا مستقبل وی مخدوش نظر آندا اے۔ ایم کیو ایم حکومتی اتحاد چوں نکلن لئی پھڑپھڑا رہی اے اوہدے ولوں استعفے دین دا فیصلہ کیتا گیا اے۔ ایس فیصلے تے اوہ کس حد تک قائم رہندے نیں ایہ واقعی اک سوال اے۔ اوہناں لوکاں نوں جو طاقتاں پی ڈی ایم دی حکومت دے نال کھڑا کرن وچ کردار ادا کر رہیاں سن اوہناں طاقتاں وچ وی تبدیلی آ چکی اے۔ ہن انج نظرآندا اے کہ اسٹیبلشمنٹ کسے دی وی بانہہ مروڑ کے کسے پارٹی دے نال چلن تے دباء نہیں پا رہی۔ اسٹیبلشمنٹ توں ایسے کردار دی توقع سی تے ہے وی۔
ایم کیو ایم نے بلدیاتی انتخابات وچ سندھ حکومت ولوں تعاون نہ کرن تے قومی اسمبلی توں مستعفی ہون دا فیصلہ کیتا اے۔ ایس حوالے نال حکومت نے متحرک ہونا ای اے۔ متحدہ دے مطالبے منن دی یقین دہانی کرائی جاوے گی تے اوہناں نوں ہور مراعات وی دتیاں جان گئیاں پر ایہ عارضی تے ناپختہ حل اے۔ آخر کدوں تک حکومت دولت دے زور تے چل سکدی اے۔ حل اک ای اے کہ لوکاں توں فریش مینڈیٹ لے لیا جاوے۔
دوستو! پاکستا ندی موجودہ سیاسی صورتحال ایہہ وے کہ اک پاسے تے مرکز وچ حکمران 13 سیاسی پارٹیاں دا اتحاد پی ڈی ایم ویلے توں پہلاں الیکشن کران تے راضی نظر نہیں آ رہیا جد کہ دوجے پاسے پی ٹی آئی تے ق لیگ دی قیادت مارچ’ اپریل تک ہر صورت الیکشن کران دے حق وچ نیں تے دوہاں سیاسی دھڑیاں دی ایس کشمکش وچ ملک دی سلامتی’ آئین تے جمہوریت تے معیشت نوں ڈھیر خطرے درپیش نیں تے پاکستانی معیشت دی موجودہ صورتحال ایہہ وے کہ قومی بینکاں تے اسٹیٹ بینک دے کول صرف ساڑھے چار ارب ڈالر دے ذخائر باقی رہ گئے نیں۔ ٹیکنیکل تے پروفیشنل بنیاداں تے جے گل کیتی جاوے تے مملکت خداداد اللہ نہ کرے ڈیفالٹ کر چکی اے بس ایہدا رسمی اعلان باقی اے جد کہ جنیوا کانفرنس وچ سیلاب دی مد وچ سیلاب متاثرین دی دوبارہ آبادکاری لئی اگلے تن توں پنج ورھیاں وچ اٹھ ارب ڈالر دی متوقع امداد تے تکیہ کیتی رکھنا اک تجزیہ نگار دے طور تے میری سمجھ توں باہر اے۔ خدارا ملکی سلامتی نوں داء تے نہ لائو۔٭