منڈی آلے

تابع مہمل اسم نکرہ اے۔ ایہدے بنان دا طریقہ تے اسیں کتاباں وچ پڑھیا پر ایہدا عملی شکار اسیں آپ کئی ورھیاں تک ہوندے رہے۔ تابع مہمل اوہ لفظ اے جو اک بامعنی لفظ دے نال لا دتا جاندا اے۔ اردو وچ ایہنوں ہور طریقے نال تے اسیں پنجابی وچ ایہنوں ہور طرح ساخت کرنے آں۔ پانی وانی’ میزویز’ شہروہر’ یعنی اصل لفظ دے پہلے حرف نوں وائو نال بدل دینے آں۔ پر اسیں ٹھہرے پنجابی تے اوہ وی بار دی سرسبز تے دیہاتی حسن چوں پھٹی پڑی پٹی چوں’ ایس لئی اسیں اردو دے طریقے دی تھاں تے وائو استعمال نہیں کردے اسیں ش توں تابع مہمل بنا لینے آں۔ اپنی توں پانی شانی روٹی توں روٹی شوٹی تے گڈی شڈی۔ آپ ساڈا ضلع تے شہر منڈی بہائوالدین اک عرصے تک گجرات ضلع دا تابع مہمل بنیا رہیا۔ سیاست ہووے یاں تعلیم ذرائع رسل تے رسائل ہون یاں صنعت نیشنل سنٹر ہون یاں ادب دا شعبہ سارا حصہ گجرات تک محدود رہندا۔ جیویں ٹیل تک آندے آندے پانی ختم ہو جاندا اے انج ای ساریاں سہولتاں ساڈے شہر تک آندے آندے ختم ہو جاندیاں۔
گجرات شہر اک صنعتی علاقہ ہو گیا تے ساڈے ایتھے اجہی کسے نعمت یاں ترقی دا خیال وی صرف خیال ای سی۔ کجھ مہمل الفاظ اجہے نیں جہناں دا کوئی مطلب ای نہیں ہوندا جیویں جھوٹ دے نال موٹ تے سچ دے نال مچ۔ اسیں جس ادارے وچ اپنے ضلع وچ کم کردے رہے اوہدا انتظامی یونٹ کدی گجرات’ کدی جہلم تے کدی سرگودھا ہوندا۔ اسیں سارے کولیگ ایہنوں مفتوحہ علاقہ کہندے۔ ساڈا شہر ضلع کیہ بنیا ترقی دیاں راہواں تے موٹروے نال رابطہ ہویا ملک دی وڈی یونیورسٹیاں دے کیمپس کھلن لگ پئے۔ ہن یونیورسٹی آف منڈی بہائوالدین دا خواب وی پایہ تکمیل تک اپڑن والا اے۔ ایہناں یونیورسٹیاں دے کیمپس توں فارغ التحصیل منڈے کڑیاں نوں زندگی وچ اگے ودھن دے موقعے کیہ ملے ہن اوہ ضلع خواندگی دے لحاظ نال پنجاب دے پہلے ضلعیاں وچ شمار ہوندا اے۔ طلباء دی صلاحیتاں نوں جلا ملی تے اوہناں نے مقابلے دے امتحانات’ عدلیہ تے ادب وچ وکھری پچھان قائم کیتی۔ نوجوان شاعراں وچ صائمہ آفتاب’ حسین محسن’ نعیم رضا بھٹی’ توقیراحمد’ قاسم حیات’ عقیل عباس’ شعیب عدن تے استاد منظور واصب نے خوبصورت شاعری کرکے میدان شعر وی کسے لئی خالی نہ چھڈیا۔ نعیم رضا دے اعزاز وچ صائمہ آفتاب نے جتھے اک خوبصورت نشست دا اہتمام کیتا اوتھے اک ادبی تنظیم ”منڈی آلے” دے ناں توں جیویں ازخود وجود وچ آ گئی۔ جیویں کہیا جاندا اے لہور لہور اے’ انج ای منڈی آلے منڈی آلے ای ہوندے نیں۔ بہادر’ خوبصورت’ توانا تے اپنے زوربازو تے یقین رکھن والے۔ ایس نشست وچ شرکت کرن والیاں وچ سارے اپنے ضلعے دے سن۔ صائمہ آفتاب، نوید غازی، شعیب عدن، قاسم حیات، نعیم رضا بھٹی، زیب النسا واثق تے سیدہ جنت بخاری شامل سن۔ایہناں شاعراں دا کلام سن کے سانوں یقین ہو گیا ایس نسل نے ادب وچ وی تابع مہمل بنن توں اُکا انکار کر دتا اے۔ ادب دی روایت نال جڑے لوکاں نے امنگاں بھری شاعری کیتی’ سنائی سانوں نہال کر دتا۔
پیڑ کی کھردری تہہ بیل سے چھپ جائے گی
زخم ہے اور مسیحائی سے بھر جائے گا
(قاسم حیات )
ان کو سب کا خیال ہوتا ہے
عورتیں پہلے دیویاں ہوں گی
(زیب النسا واثق )
ملی ہوئی ہے جہاں میں جو نعمت ِگریہ
کسے خبر کہ یہ چشمہ رواں رہے نہ رہے
(شعیب عدن )
اس پر کبھی کھلے تو کیا ہے عطا کا بھید
اس آئنے پہ عکس کا جوہر کھلے کبھی
(نعیم رضا بھٹی )
نکل پڑیں کہیں طے کردہ منزلوں کی طرف
قریب جا کے کسی راستے میں گم ہو جائیں
(نوید غازی )
یہ آب ِتند رو پر جھولتے پل کی مسافت
کنارے پر کھڑے لوگوں کو اندازہ نہیں ہے
قرار ِقلب ملے راہ کا سراغ ملے
کسی مزار پہ چادر چڑھا چراغ جلا
…٭…
ہمیشہ خیر رہے ، دن ہرے بھرے جائیں
ہمارا کام دعا ہے سو ہم کرے جائیں
حضور حجرہ دل ہے یہ کوئی باغ نہیں
کہاں ٹہلنے نکل آئے ہیں ارے! جائیں
( صائمہ آفتاب )
صائمہ آفتاب دے والد سید آفتاب احمد شاہ صحیح معنیاں وچ ترقی پسند شاعر سن۔ اوہ نام نہاد ترقی پسنداں دے نیڑے وی نہیں سن پھٹکدے۔ اعلیٰ تعلیم یافتہ تے ڈھاکہ یونیورسٹی توں فارغ التحصیل’ علم’ روشنی’ فراست تے قناعت دے منبع’ تصوف دے قتیل’ دبنگ تے طاقتور لہجے وچ شاعری کرن والے آفتاب احمد شاہ’ ساڈے مہربان دوست مشفق تے وڈے بھائی۔
دیکھیے کس وقت ہم پر وار کرنے کے ارادے سے اٹھے
یوں تو چاروں اور اس کے معرکوں کی دھاک ہے
ہن ادبی مجلیاں دے بارے کہیا جاندا اے کہ اوہ صوری تے معنوی اعتبار نال خوبصورت نیں انج ای صائمہ آفتاب وی صوری تے معنوی طور تے بڑی خوبصورت اے اوہ آپ وی تے اوہدی شاعری وی’ تے سب توں ودھ کے تنظیم ”منڈی آلے” دی شان وی۔