لوک فنکار
اوس ویلے دکی نیں فی البدیع سر آکھی۔
” بنھ کے تلھڑا ٹِھل پاں کلی
نہ بیڑی پتن نہ ٹاہنگ سولی
حق سچ دا ضامن ایں
بھار میرا جھلیں “
انج دونواں دریا پار کیتا تے دکی دے گھر پنڈ فاضلکا اپڑے ۔دکی دا دوجا ویاہ میاں الہی بخش “سکتر کا(جلال آبادی) نال ہویا جہیڑا نواب قطب الدین جلال آبادی دا بھنیواں سی ۔ ایہدے نال وی دکی دی نہ بنی تے دکی اوس کولوں طلاق لے لئی ۔ دکی دا تیجا نکاح سردار بیلا ڈھنڈی نال ہویا ۔ ایہہ بندہ سخت مزاج سی تے اوس دکی نوں طلاق دے دتی۔ بعد وچ سردار بلندا سنگھ بگھے کا دے آکھن تے سردار جیمل مراد کے دکی نوں طلاق دے چھڈی ۔ دکی چار ویاہ کیتے سن ۔ چوتھا تے آخری ویاہ شماں قصائی قصور آلے نال کیتا ۔ ایہہ سوہنا تے نوجوان سی ۔ دکی جو کمائی کردی اوہ لیا کے شمے نوں دیندی ۔ دکی آپدی کمائی نال پاک پتن لاری اڈا دے نیڑے اک پلاٹ خریدیا ۔ جتھے اوہدے بھانجے قبضہ کر لیا تے اج وی اوھتے وقار کلینک اے ۔ آخری عمر وچ دکی جیجاں ناں دی طوائف نوں آپدے نال رکھ دی سی ۔ بر صغیر دی ایہہ عظیم لوک گلوکارہ 1985 وچ انتقال کیتا تے پاک پتن وچ دفن ہوئی ۔
دکی دی نر آواز سی ۔ اوس ہمیش مرداں دی محفل وچ گایا ۔ جلال آباد توں قصور تے قصور توں دریائے ستلج دے نال ٹھینگ موڑ، حجرہ شاہ مقیم ، دیپال پور ، شیر گڑھ ، بصیر پور ، منڈی احمد آباد ، پاک پتن ، عارف والا ، بہاول نگر تائیں ہر پنڈ وچ سر دی محفل لائی ، لوکاں دے دلاں تے راج کیتا۔
دکی “دوآنگلا” سراں آکھیاں تے لوک راگاں نوں پسند کیتا۔ ساری عمر سراں آکھیاں ۔ کئی واری اوس دی سر دے مجمعے وچ اینے لوک ہوندے جے اوہناں نوں کھلون بہن دی تھاں نہ لبھ دی تے اوہ گھراں چھتاں تے درختاں اتے چڑھ جاندے ۔ کئی واری درختاں اتے گھنے بندے بہن نال تے بہتے بھار پاروں درختاں دے ٹاہن ڈگ پیندے ۔ بعض لوکاں دا آکھن اے جے دکی ملہار راگ وچ گایا جس پاروں مینہہ پین لگ پیا ۔ ایہہ گل ٹھیک نہیں منی جا سکدی ۔ کئی واری بہت چاہن والے بندے انج دیاں روایتاں گھڑ لیندے نیں ۔ حقی گل ایہہ وے جے دکی موسیقی دے سارے راگاں تے سراں توں واقف نہیں سی ۔ سرتے راگ بارے اوہدی کوئی بوہتی تعلیم نہیں سی ۔ ایہہ گل ضرور اے جے اوس راگ تلنگ وچ گایا تے “دوآنگلا” سراں آکھیاں ۔ راگ تلنگ بارے ریڈیو پاکستان لاہور دے مشہور کلاسیکی ڈائریکٹر تے کمپوزر،موسیقی دے بہت وڈے استاد غلام حیدر جیہڑے موسیقی دیاں کئی کتاباں نغمات خسرو ، سو اچھوت راگ، تے کہت سدا رنگ ، ورگیاں کئی کتاباں دے مصنف نیں۔ (جاری اے)
