انت بحر دی خبر نہ کائی

امر جلیل

کہاوت اے کہ جوانی دیوانی ہوندی اے۔ کہاوتا ںدے استاداں توں معذرت دے نال‘ میں ایس کہاوت وچ ڈنڈی مارنا چاہنا واں۔ جوانی دیوانی نہیں ہوندی‘ جوانی سانوں دیوانہ بنا دیندی اے۔ ایس گل دا پتہ سانوں بہت دیر توں‘ بہت بعد وچ ہوندا اے۔ اودوں تک بہت سارا پانی پلاں دے تھلیوں گزر چکیا ہوندا اے۔ بہت سارے خواب تعبیراں توں پہلے ٹٹ پھٹ کے بکھر چکے ہوندے نیں۔ زندگی وچ جو کجھ ممکن لگدا سی اودوں ناممکن لگن لگدا اے۔ اودوں‘ کہاوت دے برعکس‘ پتہ چلدا اے کہ جوانی دیوانی نہیں ہوندی۔ جوانی دے آندیاں ای اسیں دیوانے ہو جانے آں۔ جوانی وچ کیتے ہوئے کئی وعدے‘ بچگانہ تے احمقانہ لگدے نیں۔ اسمان توں تارے توڑ کے کسے دی جھولی وچ پان ورگیاں گلاں تے کدی ہسی تے کدی شرمندگی محسوس ہون لگدی اے۔ تیرے بناں میں جی نہیں سکاں گا۔ جیویں دعوے دھرے دے دھرے رہ جاندے نیں۔ جدا ہو جان دے بعد اوہ زندہ رہندیاں نیں۔ اسیں وی اوہناں دے بناں زندہ رہنے آں۔ اوہ اپنی تھاں نانی تے دادی ہو جاندیاں نیں۔ اسیں اوہناں دے بناں نانا تے دادا بن جانے آں۔
اوہ کوئی ہور ہوندے نیں جو کسے توں بچھڑ جان دے بعد جوگ لے لیندے نیں۔ اوہ ہوندے تے ساڈے درمیان نیں پر اسیں اوہناں نوں پچھان نہیں سکدے۔ بڑھاپا اصل وچ زندگی دے گزرے ہوئے ادوار بچپن‘ لڑکپن‘ نوجوانی‘ جوانی تے ادھیڑ عمری دا محاصرہ کرن دا دور ہوندا اے۔ بڑھاپا ماضی وچ تک کے ویکھن دا دور ہوندا اے پر اودوں تک بہت دیر ہو چکی ہوندی اے۔ تہاڈا ہر طرح دا جووی نقصان ہونا ہوندا اے اوہ ہو چکیا ہوندا اے۔ تہاڈی وجہ نال جس کسے دا نقصان ہو چکیا ہوندا اے اوہ ہو چکیا ہوندا اے جو بازی الٹ چکی ہوندی اے اوہ الٹ چکی ہوندی اے۔ تسیں الٹ چکی ہوئی بازی نوں بڑھاپے وچ پلٹ نہیں سکدے۔ اپنی جوانی وچ تسیں جہناں جہناں نوں اجاڑ دتا ہوندا اے اوہ اجڑ چکے ہوندے نیں۔ آخری عمر وچ یعنی بڑھاپے وچ تہاڈے پچھتان نال اجڑے ہوئے لوک فیر توں آباد نہیں ہو سکدے۔ تہاڈے رون دھون تے گڑگڑان نال کجھ نہیں ہوندا۔ تسیں اپنے ماضی وچ ترمیم نہیں کر سکدے۔ تسیں اپنے ماضی دی حماقتاں دا ازالہ نہیں کر سکدے۔ تسیں اپنے ماضی نوں ایڈٹ نہیں کر سکدے۔ جاندے ہوئے تسیں اپنا ماضی اپنے نال لے جاندے او۔ اک نوجوان نے کہیا‘ جدوں بڑھاپا آوے گا اودوں ویکھیا جاوے گا۔ اجے سانوں بڑھاپے دے بارے سوچن دی ویہل نہیں۔
تقریباً ایسے قسم دی سوچ ہوندی اے جدوں اسیں نوجوان ہونے آں۔ اک لمحے لئی وی اسیں سوچ نہیں سکدے کہ اک نہ اک دن اسیں بڈھے ہو جاواں گے۔ بڑھاپے نوں بھگتدے ہوئے نوجوانی تے جوانی دے کجھ ورھیاں نوں یاد کراں گے۔ اپنے اک اک فعل تے سوچاں گے نوجوانی تے جوانی دے عالم وچ کیوں سانوں خیال نہیں آندا کہ زندگی دا ڈرامہ جہدی ابتدا ساڈے جنم توں ہوندی اے ایس ڈرامے دا اک اختتامیہ وی ہوندا اے۔ نوجوانی تے جوانی دے دور وچ اسیں لمحہ بھر لئی قدرت دے دستور تے دھیان نہیں دیندے۔ سب کجھ ظاہر ظہور اے۔ ساڈیاں نگاہواں دے سامنے کھیل کھیڈیا جا رہیا اے۔ بچے جنم لے رہے ہوندے نیں۔ چھڈن والے ایہ دنیا چھڈدے رہندے نیں۔ ابتدا تے انتہا دے درمیان اسیں حیاتی گزار دیندے نیں۔ بہت کجھ یاد رہ جاندا اے۔ بہت کجھ اسیں بھل جانے آں۔ جو وقت اجے آیا نہیں۔ اوس ویلے دی فکر اسیں کیوں کریئے۔
بھج نس توں دوری تہانوں زندگی دا خالی پن تے پھکڑ پن وکھاندی اے۔ غم روزگار تے اپنی ذات دی تصدیق لئی اسیں بھج نس کرنے آں۔ بڑھاپے وچ تسیں اپنے ہون دی تصدیق توں محروم ہو جاندے او۔ دنیا بھر دے روگ سانوں اپنی لھویٹ وچ لے لیندے نیں۔ ویکھدیاں ای ویکھدیاں جین دے جتن اوکھے ہو جاندے نیں۔ وقت کٹدا نہیں وقت سانوں کٹن نوں پیندا اے۔ تسیں اپنے آپ نوں مصروف رکھنا چاہندے او پر تہاڈے کول اپنے آپ نوں مصروف رکھن دا ہنر نہیں ہوندا۔ بڑھاپے وچ کوئی ہنر سکھنا ممکن نہیں لگدا۔ وباواں تہانوں نواں ہنر سکھن نہیں دیندیاں۔ میں ایہ نہیں کہندا کہ بڑھاپے نال نبڑن لئی تسیں جوانی وچ باڈی بلڈنگ سکھ لوو۔ ایہدے نال کجھ نہیں ہوندا۔ رستم زماں‘ گاما پہلوان دا بڑھاپا دردناک سی۔ جوانی وچ مستقل مزاجی نال سکھے ہوئے ہنر بڑھاپے وچ کم آندے نیں۔ ہنر سکھن توں میری مراد مشیناں چلانا نہیں۔ ڈیجیٹل میڈیا پگڑی اچھالن تے اک دوجے نوں گالھاں کڈھن دا ہنر نہیں۔ ڈیجیٹل میڈیا نال دل لگان دے بعد دنیا تہانوں مٹھی وچ محسوس ہوندی اے۔ تسیں چنگی توں چنگی فلماں ویکھ سکدے او۔ اپنی پسند دے کھیڈ ویکھ سکدے او۔ وکھووکھ ملکاں دی دستاویزی فلماں ویکھ سکدے او۔ دنیا بھر دی لائبریریز‘ میوزیم‘ تھیٹر‘ آرٹ گیلریز وچ جا سکدے او۔ اوتھے رکھیاں شیواں تے نوادرات ویکھ سکدے او۔ ایہ سب کجھ تسیں بیٹھے بٹھائے‘ موبائل فون تے ریموٹ کنٹرول نال کر سکدے او۔ تسیں ڈیجیٹل میڈیا تے شطرنج تے لڈو دا کھیڈ‘ کھیڈ سکدے او۔ تسیں کرکٹ میچ ویکھ سکدے او‘ فٹ بال دے میچز ویکھ سکدے او۔ کسے وی ملک دی تریخ تے جغرافیے دے بارے جانکاری حاصل کر سکدے او پر ایس کم دی ابتدا نوجوانی تے جوانی سگوں ایس توں پہلاں لڑکپن توں ہوندی اے۔٭