سُفنے تے تعبیراں

ایہ گل حقیقت اے کہ انسان نماز پڑھدیاں سجدے وچ وی ہووے تے اوہدے دل دماغ اندر خیال آ جا رہے ہندے نیں۔ایتھوں تیک کہ انسان جِدوں بال ایانا ای ہندا اے تے اوہدوں وی اوہدے دماغ اندر دھندلیاں انھیاں گونگیاں تصویراں بھجیاں پِھردیاں نیں۔جیہڑیاں پھر عمر ودھن دے نال نال نِکھر دِیاں نیں۔ایہ سب خیال تے سوچاں تصویراں کسے نہ کسے طرحاں اِک طرحاں دے سفنے ای ہندے نیں۔ویکھیا جائے تے انسان دی ساری زندگی سفنے تے تعبیراں دے وچکار ای کِھلری ہوئی اپنے معنے تے مفہوم دے رہئی اے۔کجھ سفنے انسان کھلی اکھیں ویکھدا اے تے کجھ بند اکھیں نیندر وچ ویکھدا اے۔نیندر وچ ویکھے گئے سفنیاں دی وی کوئی نہ کوئی تعبیر ہندی اے،تے کھلی اکھیں ویکھے گئیے سفنیاں دی تعبیر اصل وچ کِسے سوچ،جذبے تے نظرئیے دا ناں اے۔تے کھلی اکھیں ویکھے گئے سفنے تعبیراں دا روپ دھارن لئی انسان کولوں ہِمت حوصلہ،تدبر،سوچ وچار،محنت تے قربانی منگدے نیں۔ویکھیا جائے تے انسان دی پوری حیاتی سفنے تے تعبیراں دا کِھلریا ہویا جال اے۔جہدے وچ انسان دی زندگی دا پکھی پھڑپھڑا رہیا اے۔سفنے تے تعبیراں دو نقطیاں یاں دو سِریاں دی طرحاں نیں۔تے ایہناں دو نقطیاں وچکار دے فاصلے نوں انسانی زندگی کہیا جاسکدا اے۔انسان رنگ رنگ دے سفنے ویکھدا اے تے رنگ رنگ دیاں تعبیراں سوچدا،لبھدا تے کڈھدا اے۔انسانی زندگی دے ایس گوڑھے تے ڈونگھے مطالعے نوں سفنے تے تعبیراں دے رنگ وچ موضع بجاڑ شکرگڑھ دے واسی پنجابی شاعر جناب بشیر کمال نے اپنی کتاب”سفنے تے تعبیراں”وچ بند کرکے قلم دے کمال توں پورا کم لیا اے۔ایس کتاب نوں ادارہ”پنجابی لکھاریاں جیا موسی شاہدرہ” نے بڑے گوہ تے اچیچ نال چھاپیا اے۔بشیر کمال نے ایس کتاب اندر ایہ کمال کیتا اے کہ اوہناں زندگی دے نِکے نِکے پکھاں تے معاشرتی رویے اتے قلم توں کم لیندے ہوئے کئی سفنیاں دی گل کیتی تے کئی تعبیراں دی دس پائی اے۔بشیر کمال اپنیچنگے سفنیان دِیاں بھیڑیاں تعبیراں اتے کرلاوندے نظر آرہے نیں۔تے کدھرے اوہ بھیڑے سفنیاں دِیاں چنگیاں تعبیراں ویکھن لئی ترسدے تے تڑپھدے نظر آوندے نیں۔اوہناں دی کتاب”سفنے تے تعبیراں”اندر دراصل پوری زندگی دے سفنے تے تعبیراں دا ای ذکر اے۔کدی اِنج وی لگدا اے کہ جدوں بشیر کمال نوں جدوں چنگے سفنیاں دی تعبیر چنگی نہیں مِلدی تے اوہ دکھ تے غصے دی رلی مِلی کیفیت وچ پاگل جہئے ہوکے رولا پوندے نیں۔تے زمانے توں سوال کرکے پچھدے نیں۔
سفنے تے تعبیراں کِیہ نیں
دسو ہاں تقدیراں کیہ نیں
کِیہ متھے دا لِکھیا ہویائے
ساڈے ہتھ لکیراں کِیہ نیں
ملاں جی اس رب توں ڈر کے
دسیا جے تفسیراں کِیہ نیں
تے اک تھاں تے بشیر کمال جی سفنے تے تعبیراں دے جھیڑے وچ پھسے ہوئے اپنی بے وسی دا ذکر کچھ اِنج کردے نیں کہ۔
ہنجو ہوکے ہاواں نال
لڑئیے کِنج بلاواں نال
ساڈی جان ای لے بیٹھا اے
چنیا سی جو چاواں نال
تے ایسراں تھاں تھاں تے بشیر کمال ہوری تعبیراں ہتھوں سفنیاں دے قتلام اتے اتھرو وگاوندے تے ہاڑے پاوندے وکھالی دیندے نیں۔جسراں کہ اوہ آکھدے نیں۔
دسنا واں میں صاف کِسے نوں
مِلدا نہیں انصاف کِسے نوں
جس دے ہتھ حکومت ہووے
اوہ نہیں کردا معاف کِسے نوں
بشیر کمال اپنے چار چوفیرے سفنیاں تے تعبیراں دا قتلام ہندا ویکھ کے وی امن پسندی تے صبر توں کم لیندے ہوئے دشمناں تے سنگدِلاں نوں رب ولوں ہدائیت تے جیون جوگی دعاواں دین دے چاہیوان نیں۔اوہ آکھدے نیں۔
ایدھر اودھر سارے پتھر
میں ہویا وچکارے پتھر
اوہنوں رب حیاتی دیوے
جس نے مینوں مارے پتھر
بشیر کمال دھرتی اتے چار چوفیرے امن،محبت تے ملنساری دے سفنے ویکھ رہے نیں تے اوہ زمانے اتے ایہناں سفنیاں دی تعبیر وی ویکھنا چاہندے نیں۔اوہ آکھدے نیں
گل سن ادھر آ تے ہس
غصہ چلہے پا تے ہس
چھڈ وی دے ہن پِچھلیاں گلاں
گھٹ کے جپھی پا تے ہس
میری دعا اے کہ رب پاک بشیر کمال جہئیے بِیبے تے پیار کرن والے ایس جی دے سفنیاں نوں نیک تے چنگیاں تعبیراں دے کے اوہناں دے سفنے رب توڑ چاڑھے۔
٭٭٭