سانحے لیڈرشپ دا امتحان ہوندے نیں

مطلوب وڑائچ

ایہ 2004ء دے شروع دی گل اے۔ میرا بیٹا تے بیٹی ترکی گئے ہوئے سن تے ایس دوران استنبول دے آل دوالے بڑا شدید زلزلہ آیا‘ جہدے وچ ہزاراں بندے جان دی بازی ہار گئے تے ہزاراں عمارتاں تے انفراسٹرکچر تباہ ہوئے۔ مینوں جدوں سوئٹزرلینڈ وچ ایہ اطلاع ملی تے میں فوری طور تے ترکی اپڑیا تے میرے بچے جو اللہ دے کرم نال ایس سانحے وچ محفوظ رہے اوہناں نوں اوسے شہر وچ لبھ کے واپس سوئٹزرلینڈ لیایا۔ دوستو کجھ دیہاڑ پہلاں وی ترکی وچ اک ہلاکت خیز زلزلہ آیا جہدے وچ ہن تک ترکی تے شام سنے تریہہ ہزار بندے شہید ہو چکے نیں تے اتفاق نال میرا بیٹا تے بیٹی اپنی سالانہ چھٹیاں تے ہن وی ترکی وچ ای سن پر کیوں جے ہن اوہ جوان ہو چکے نیں جیویں ای میرا اوہناں نال رابطہ ہویا تے میں اوہناں نوں ایہ کہیا کہ اوہ فوری طور تے اپنے ترک بھائیاں تے بھیناں دی مدد لئی متاثرہ علاقیاں وچ جان تے اوہناں دی امداد وچ ودھ چڑھ کے حصہ لین۔
دوستو! سوشل میڈیا تے میں اک مشہورومعروف پاکستانی مفتی صاحب دا اک بیان سن رہیا سی جہدے وچ اوہ فرماندے نیں کہ ترکی وچ زلزلہ اوہناں دے اعمال دی سزا اے تے جناب اوہناں مفتی صاحب اگے میری گزارش اے کہ تسیں سماجی رابطے دی ویب سائٹ تے گوگل کرکے ویکھ لوو کہ دنیا دی تریخ ایہناں قدرتی آفتاں نال بھری پئی اے۔ صرف پچھلے ستر ورھیاں وچ ترکی وچ چھوٹے تے وڈے ہزاراں زلزلے ریکارڈ تے آ چکے نیں جہناں وچ مرن والیاں دی گنتی لکھاں وچ اے۔ ترکی‘ جاپان تے میکسیکو جغرافیائی طور تے اوہناں علاقیاں وچ آباد نیں جتھے 5 توں 9 ری ایکٹر سکیل دے زلزلے آنا معمول دی گل اے تے ایہناں دا ورھے وار تناسب سینکڑوں وچ اے۔ ایس لئی ہر سانحے تے آفت نوں اللہ تعالیٰ دے کھاتے وچ پانا کوئی عقل مندی نہیں پر اج وی ویکھو تے ترکی تے جاپان ترقی دی منزلاں نوں نہ صرف چھو چکے نیں سگوں بین الاقوامی طور تے اک لیڈنگ ملکاں وچ ایہناں دا شمار ہوندا اے۔
جنگ دی تیاری لئی نبی اکرم صلی اللہ علیہ وآلہ وسلم ہوراں ولوں صحابہ کرام نوں اپنی مال و دولت توں حصہ پان لئی فرمایا گیا تے صحابہ کرام جو کجھ لے کے آئے۔ اک صحابی توں حضرت محمدؐ ہوراں پچھیا کہ کناں سامان لے کے آئے او۔ اوہناں آکھیا کہ ادھا گھر چھڈ آیا واں‘ ادھا میں لے آیا واں۔ ایہدے بعد اک ہور جید صحابی اگے ایہو سوال کیتا تے اوہناں نے آکھیا کہ اے اللہ دے نبیؐ تہاڈے تے میرے ماں باپ تے اولاد قربان۔ میں گھر وچ کجھ وی نہیں چھڈ کے آیا‘ اللہ تے اوہدے رسولؐ دا ناں چھڈ کے آیا واں۔ باقی میں سب کجھ اپنے نال لے کے آیا۔ ایہ ہوندا اے ایثار تے قربانی دی انتہا تے فیر ایہو دوویں صحابہ کرام خلیفہ رسولؐ وی مقرر ہوئے سن۔ اجہیاں ان گنت مثالاں دتیاں جا سکدیاں نیں۔ قائداعظم بانی پاکستان اوہناں نے اپنی زندگی وچ اپنی ساری جائیداد کجھ اپنے حقیقی وارثاں دے ناں لا کے باقی ساری دی ساری پاکستان دے ناں کر دتی سی۔ لہور دا کور کمانڈر آفس ایہ قائداعظم دی اپنی رہائش گاہ سی ایہ کور کمانڈر آفس اے تے فیر پنجاب یونیورسٹی جو کنے میلاں تے کھلری اے ایہ جائیداد وی قائداعظم دی سی۔ قائداعظم دی جائیداد پشاور وچ‘ کراچی وچ تے تقسیم دے بعد جو شہر بھارت وچ آ گئے ممبئی تے دہلی وچ وی سی۔ پاکستان وچ موجود ساریاں جائیداداں قائداعظم نے اپنی زندگی وچ ای پاکستان دے اداریاں نوں وقف کر دتیاں سن۔ ایہ ہوندی اے لیڈرشپ۔ تے ایہ لیڈرشپ اوسے ویلے ای ختم نہیں سی ہو گئی‘ اج وی تہانوں پاکستان وچ اجہی بہت ساریاں مثالاں مل جان گئیاں۔
جدوں تھوڑا جیہا اسیں دنیا تے نظر مارنے آں تے اج طیب اردگان اوہ سامنے آندے نیں طیب اردگان توں پہلاں تھوڑا جیہا ذکر کر لینے آں اک دور وچ دنیا دے سب توں امیر بندے آئی ٹی دی دنیا دے سب توں وڈے ناں بل گیٹس دا‘ اوہناں نے اپنی جائیداد دا بہت وڈا حصہ وقف کر دتا سی۔ اپنی اولاد لئی تھوڑا جیہا چھڈیا۔ ترکی وچ شدید ترین زلزلہ آیا۔ ترکی ول امدادی کاروائیاں شروع کر دتیاں گئیاں۔ ساڈے وزیراعظم شہبازشریف نے ترکی جان دا اعلان کر دتا۔ ترکی ولوں ساڈے وزیراعظم دا استقبال کرن توں معذرت کر لئی گئی۔ اوہناں آکھیا کہ اسیں امدادی کاروائیاں وچ مصروف آں۔ وزیراعظم صاحب جہڑے پوری تیاری کرکے بیٹھے ہوئے سن اوہناں نوں اپنا دورہ موخر کرنا پیا۔ طیب ادگان نے امداد لئی دنیا نوں وی کہیا‘ اپنے ملک وچ وی اوہناں نے ایہو کجھ درخواست کیتی پر سب توں پہلاں طیب اردگان نے ایہدے وچ حصہ پایا۔ طیب اردگان ولوں اوہو کجھ کیتا گیا جو کجھ قائداعظم محمدعلی جناح نے پاکستان لئی کیتا سی۔ طیب اردگان نے اپنی ساری دی ساری جائیداد اپنے ملک دے ناں کر دتی۔ حالاں کہ اوہناں نے اپنے لئی گھر تک وی نہیں رکھیا۔ ایدھر ذرا ساڈے حکمراناں نوں ویکھو‘ ایہناں تے کنے وڈی وڈی مالیت دے کیسز سن اوہ سارے اوہناں نے نیب نوں کنٹرول کرکے‘ نیب قنوناں وچ بدلی کرکے ختم کروا لئے نیں تے ختم کیتے جا رہے نیں۔ بیرون ملک کجھ ساڈے پاکستان دے سیاستداناں دے کیسز چلے‘ اوتھے اوہناں نوں زلزلہ متاثرین دی امداد دے پیسے کھان‘ خردبرد کرن تے کیس چلیا‘ اوہدے وچ جرمانہ ہو چکیا اے۔ بل گیس تے دوجے اجہے لوکاں نے ایہ سارا کجھ کتھوں سکھیا کہ اپنی ساری جائیداد اپنے ملک لئی‘ غریباں لئی‘ مستحق بندیاں لئی وقف کر دتی۔ ایہدی اسیں پہلے مثال دے چکے آں کہ نبی اکرمؐ ہوراں دے حکم تے کس طرح صحابہ کرامؓ نے اپنے اثاثے‘ اپنیاں جائیداداں جنگ لئی جمع کروا دتیاں سن۔ لیڈر بنن لئی اجیہا ایثار کرنا پیندا اے اجہی قربانی دینی پیندی اے۔٭