جان تے مال

مظہر برلاس

کسے وی ریاست دے باشندے ٹیکس ایس لئی بھردے نیں کہ اوہناں دی بنیادی لوڑ ریاست پوری کرے۔ خاص طور تے اوہناں دی جان و مال دا تحفظ ریاست دی پہلی ذمہ داری اے۔ پاکستان وچ بدقسمتی نال ریاست لوکاں دیاں مڈھلیاں لوڑاں پوریاں کرن توں قاصر اے۔ ایتھے صحت‘ تعلیم‘ خوراک تے چھت دی ذمہ داری توں ریاست نے بہت پہلے ہتھ چک لیا سی ہن ریاست نے جان و مال دے تحفظ دے فرض توں وی کوتاہی ورتنی شروع کر دتی اے۔ ملتان وچ دو نوجوان لڑکیاں نوں پولیس نے بھن کے رکھ دتا۔ گلگت بلتستان وچ چھ بچیاں نوں سرکاری گڈی نے مدھ دتا۔ اسلام آباد‘ راولپنڈی تے لہور سنے پاکستان دے کئی شہراں وچ چوری‘ ڈکیتی تے قتل دے کئی واقعات ہوئے۔ لوکاں دیاں گڈیاں تے موٹرسائیکلاں چوری ہوئیاں۔ عید تے ایہناں وارداتاں نے کئی گھرانیاں نوں خشیاں دی تھاں غم دتا۔ ہن ریاست نہ کسے نوں گڈی دے رہی اے نہ موٹرسائیکل دے ریہ اے نہ کسے نوں اوہدی جان دا نعم البدل ملنا ممکن اے۔ جدوں ایہ سب کجھ نہیں ہو رہیا تے پولیس دے ناں تے اینیاں تنخواہواں دین دا کیہ فائدہ۔ جے ایہ محکمہ لوکاں دے مال و جان دا تحفظ نہیں کر سکدا تے فیر ایس محکمے نوں ختم کر دتا جاوے۔ ایہ محکمہ کیوں ریاست تے بھار بنیا ہویا اے۔ اک ڈیڑھ مہینہ پہلاں میں ایسے حوالے نال اک لکھ لکھیا سی جہدے وچ دو واقعات دا خاص طور تے تذکرہ کیتا سی پہلا واقعہ ایہ سی کہ میرے چھوٹے بھائی عمار برلاس توں راولپنڈی دی اک مصروف مارکیٹ وچ موبائل کھوہ لیا گیا لکھاں روپیے دی مالیت دا موبائل فون کھوہے جن تے میں راولپنڈی پولیس دے سربراہ خالد ہمدانی نال تذکرہ وی کیتا پر اجے تک ایہدا نتیجہ صرف اے۔ دوجے واقعے وچ ایہ بیان کیتا گیا سی کہ میرے اک استاد دے بیٹے حسن دانیال نوں لہور وچ لٹ گیا گیا اوہناں توں موٹرسائیکل‘ لیپ ٹاپ‘ موبائل تے نقدی کھوہ لئی گئی ایس سلسلے وچ میں لہور پولیس دے افسران نوں دسیا پر ایہدا نتیجہ وی صفر نکلیا۔ جے دور نگرانی وچ وی انج ہونا سی تے فیر اجہی نگرانی دا کیہ فائدہ۔ نگران تے انج وی عارضی ہوندے نیں۔
چلو اسیں کراچی دی گل کر لینے آں جتھے مستقبل حکومت قائم اے۔ ایس ورھے مارچ دے مہینے وچ کراچی شہر توں 188 گڈیاں چوری ہوئیاں۔ سرکاری ریکارڈ دے مطابق پنج ہزار 57 موٹرسائیکل اک مہینے وچ چوری ہوئے تے ایسے میہنے وچ 2577 موبائل فون کھوہے گئے۔ جے قتل دے معاملات نوں ویکھیا جاوے تے ایس ورھے دے پہلے دو مہینے وچ کراچی شہر وچ 99 بندے مارے گئے۔ حیران کن گل ایہہ وے کہ شہر قائد وچ جرائم پیشہ بندیاں نے ڈر پھیلا رکھیا اے تے ایس توں وی حیران کن گل ایہہ وے کہ محکمہ پولیس دے کافی اہلکار خطرناک جرائم وچ ملوث پائے گئے۔ کراچی پولیس دے اپنے اعدادوشمار دے مطابق ایس ورھے دے پہلے ساڑھے تن مہینیاں وچ ستاراں پولیس اہلکاراں دے خلاف مقدمے درج ہوئے تے اٹھاراں پولیس اہلکاراں نوں غیرقنونی کماں وچ ملوث ہون دی وجہ نال معطل کیتا گیا۔ ایہناں پولیس اہلکاراں تے اغوا برائے تاوان‘ اختیارات دا غلط استعمال‘ علاقے وچ جرائم پیشہ بندیاں دی سرپرستی سنے دوجے سنگین الزامات نیں۔ حالیہ دیہاڑیاں وچ شارٹ ٹرم کڈنیپنگ‘ جھوٹے مقدمیاں راہیں شہریاں توں پیسیاں دی وصولی توں علاوہ اغوا تے ڈکیتی ورگے واقعات وچ وی پولیس اہلکاراں دے ملوث ہون دا انکشاف ہویا جہدے بعد کئی اہلکاراں نوں پھڑیا گیا۔ کجھ دن پہلاں قائدآباد دے شہریاں نوں سستے مُل کالے بچھو دی وکری دا جھانسہ دے کے پولیس اہلکاراں نے نارتھ ناظم آباد وچ شہریاں نوں اغوا کر کے قید رکھیا تے اک ہور شہری دے ٹبر توں پنج لکھ دا مطالبہ کیتا ایس مطالبے دے بعد اے وی سی سی نے کاروائی کردے ہوئے شہریاں نوں پولیس تھانے چوں بازیاب کروایا تے ایس مرحلے تے دو برطرف اہلکاراں سنے پنج پولیس اہلکاراں نوں پھڑ لیا گیا۔ ایسے طرح نادرن بائی پاس دے نیڑے اک مال بردار گڈی کھوہن دے الزام وچ دو پولیس اہلکاراں سنے پنج بندے پھڑے گئے جہناں دے قبضے چوں گڈی سنے دوجا سامان برآمد ہویا۔
جے معاشرے وچ لوکاں دے جان و مال دے تحفظ دا ایہو عالم اے تے فیر دو چار سوال ریاست دے سامنے ضرور کھڑے ہو جاندے نیں۔ ایہ لوک پچھن وچ حق بجانب نیں کہ اسیں اپنی جان و مال دے تحفظ لئی ٹیکس بھرنے آں تے فیر سانوںایہ تحفظ کیوں نہیں دتا جاندا جے کسے دی گڈی‘ موٹرسائیکل یاں موبائل فون کھوہے جان تے پولیس ایف آئی آر درج کرن توں ہچکچاندی اے۔ وڈیاں سفارشاں دے بعد ایف آئی آر درج کیتی جاندی اے تے فیر ایف آئی آر درج کروان والا ساری زندگی کاغذ دے ایس ٹکڑے نوں ویکھدا رہندا اے کیوں جے نتیجہ صفر ای رہندا اے۔ اک بڑے سمجھدار پولیس افسر شیخ عمر مرحوم کہندے سن کہ پولیس وچ پولیسنگ دی بہوں لوڑ اے ایسے لئی شیخ عمر مرحوم نہ صرف پولیس اہلکاراں سگوں پولیس افسراں نوں وی ہتھکڑیاں لگوا دیندے سن۔ انج لگدا اے جیویں ہر گلی وچ جرائم پیشہ بندیاں دے ڈیرے ہون‘ ہر چوک تے ڈاکوئواں دا کوئی ہجوم ہووے‘ ہر بازار وچ لٹیرے گھمدے ہون تے ہر ناکے تے ایہناں لٹیریاں دے ساتھی کھڑے ہون۔٭