بجلی گیس نہ آٹافیر وی اے سناٹا
نہ بجلی’ نہ پانی’ نہ گیس ‘ نہ آٹا تے ودھدا جا رہیا سناٹا تے بس ایہو پچھنا سی کہ اینا ای کافی اے یا ہور چاہیدا اے پرانا پاکستان ۔؟کیوں جے جدوں اسیں ہوش سنبھالی تے اوس ویلے پاکستان دی ایہو صورتحال سی۔ سرے شام ای لالٹین’ دِیوے تے موم بتیاں دے انتظام دے نال نال لالٹین دی چمنی صاف کرنا وی ضروری ہوندا سی پچھلے دن موم بتیاں تے لالٹین خریدن والیاں دا دکاناں اتے رش ویکھیا تے پرانا پاکستان یاد آ گیا تے اجے تے پیٹرول دیاں قیمتاں جدوں ودھن گئیاں تے سائیکل وی سڑکاں اتے نظر آن گئیاں جو نویں پاکستان وچ غائب ہو چکے سن۔ ایہناں جھٹکیاں تے دھچکیاں توں سانوں نجات دوان والی حکمران سیاسی جماعتاں ولوں ملکی معیشت نوں سنبھالن دے دعوے دھوکہ ثابت ہوئے کیوں جے ایس ویلے عوام تے معیشت بستر مرگ اتے اے تے معیشت دی تباہی وچ حکمران اشرافیہ نے بنیادی کردار ادا کیتا اے جہناں نے خوشحال ملک نوں دیوالیہ کر دتا اے تے اوہ ہن وی حکمران اپنی ترجیحات بدل لین تے پاکستان ترقی تے لوک خوشحالی رستے اتے چل پین گے تے اوہدے لئی سانوں اپنی زراعت اتے توجہ دینی پووے گی۔ ساڈے دیہی علاقیاں وچ تقریباً 68 فیصد آبادی خوراک تے معاش لئی زراعت اتے انحصار اے۔ ایس ویلے ساڈی زراعت دے نال نال معیشت وی کمزور اے ملک نوں ایس صورتحال توں باہر نکلن دی لوڑ اے جتھے زراعت معاشی ترقی وچ سب توں ودھ معاون اے ایس لئی پاکستان نوں اپنی معایشی پالیسیاں موجودہ حالات تے عالمی نظام دے مطابق بنانا ہون گئیاں۔ پاکستان دے کول بہت سارے وسائل تے زرخیز سرزمین اے۔ ساڈی آبادی دا اک وڈا حصہ بالواسطہ یا بلاواسطہ زراعت نال جڑیا اے۔ زراعت ساڈی معیشت وچ ریڑھ دی حیثیت رکھدی اے تے غذائی تحفظ وچ اہم کردار ادا کردی اے جو جی ڈی پی دا 22فیصد اے۔ ایس ویلے ساڈی صورتحال ایہہ اے کہ ساڈے کول قرضے واپس کرن لئی پیسے نہیں نیں تے اوہناں اتے سودادا کرن لئی اسیں اپنی شیواں گروی رکھوا رہے آں۔ چالوں مالی سال دی پہلی ششمائی دے دوران قرضیاں اتے واجب الادا سود دے اخراجات 2.57 ٹریلین روپے تک ودھ گئے جو کہ قرضیاں دی ادائیگی دے سالانہ بجٹ دے 65
فیصد دے برابر اے۔ وفاقی وزیر خزانہ اسحاق ڈار نے کہیا سی کہ چالوں مالی سال وچ قرض دی ادائیگی دا حجم تقریباً 5ٹریلین روپے تک ودھ سکدا اے جو ایس سال دے 9.6ٹریلین روپے دے کل بجٹ دے نصف توں ودھ ہووے گا تے ایہہ پچھلے مالی سال دے مقابلے وچ 118 ارب روپے یا تقریباً23فیصد بوہتا اے جو وفاقی حکومت دی خالص آمدنی دے 128فیصد دے برابر اے۔ا یس توں پتہ چلدا اے کہ پاکستان قرضیاں دے جال وچ ای پھسیا رہووے گا۔چالوں مالی سال جولائی تا دسمبر کل اخراجات دا 69فیصد صرف قرضیاں اتے سود دی ادائیگی تے دفاع دی مد وچ خرچ ہویا جہدے نتیجے وچ عوام دی فلاح و بہبود تے ملکی ترقی اتے خرچ کرن لئی بہت گھٹ فنڈز حکومت دے کول بچے اعدادوشمار دے مطابق قرضیاں دی ادائیگی تے دفاع اتے 3200 ارب دے خطیر اخراجات دے مقابلے وچ ترقیاتی کماں اتے صرف 147 ارب روپے خرچ ہوئے۔ ترقیاتی اخراجات پچھلے مالی سال دے مقابلے وچ 141 ارب روپے یا 49فیصد گھٹ رہے۔ اک پاسے تے ساڈی معاشی صورتحال اینی خراب ہو چکی اے تے دوجے پاسے ملک وچ عام انتخابات دا رستہ روکن دی اجے توں تیاریاں شروع کردتیاں گئیاں نیں تے صرف دو صوبیاں وچ الیکشن مسائل دا حل نہیں ایس توں استحکام نہیں آوے گا۔ پورے ملک وچ بیک وقت انتخابات ہون جہدے لئی باقی صوبیاں سنے مرکز وچ وی نگران سیٹ اپ تشکیل دتا جاوے تے اوہدے لئی ساری سیاسی جماعتاں مذاکرات دا آغاز کرن۔ایس ویلے 22کروڑ عوام مہنگائی’ بدامنی تے بے رزوگاری دی چکی وچ پس رہے نیں۔ غربت اینی ودھ اے کہ لوکاں دے کول اک ویلے دا راشن نہیں اے ڈالر غائب ا ے تے ایہدی قدر وچ مسلسل وادھا ہو رہیا اے۔ پڑھے لکھے نوجوان مستقبل توں مایوس ملک چھڈ کے جا رہے نیں۔ عوام آٹے دی لائناں وچ کھڑے نیں۔ بنیادی شیواں دی قیمتاں غریب تے سفید پوش طبقہ دی پہنچ توں مکمل دور ہو گئیاں لوکاں لئی اک ویلے دی روٹی دا انتظام اوکھا ہو گیا۔ صحت تے تعلیم دا نظام بیٹھ گیا۔ڈھائی کروڑ بچے غربت دی وجہ نال سکولاں توں باہر نیں۔ 80 فیصد توں ودھ عوام نوں پین دا صاف پانی تک میسر نہیں سانوں ایس حال تک پہنچان والے ساڈے اپنے حکمران نیں جہناں نے اپنی جائیداداں بنائو۔ آف شور کمپنیاں بنا کے بالاں نوں بیرون ملک تے خود ایتھے ایکڑاں اتے محیط محلاں وچ رہائش پذیر نیں تے عوام بنیادی ضروریات لئی ترس رہے نیں۔ انج لگدا اے کہ اک سوچی سمجھی سازش دے تحت ساریاں نے رل کے ملک نوں سیاسی’ سماجی تے معاشی لحاظ نال دیوالیہ کردتا جہناں اوہناں دے وس وچ سی اوہ اوہناں نے کردتا۔ ہن باری عوام دی اے کہ اوہ ملک نوں معاشی لحاظ نال تباہ کرن والیاں دا ووٹ دی طاقت نال احتساب کرے ورنہ حالات ساریاں دے سامنے نیں تے پرانے پاکستان دا بوہا وی کھل چکیا اے جد کہ پچھلے دن ہون والا شٹ ڈائون پچھلے تن مہینیاں دے دوران دوجا ملک گیر بریک ڈائون سی جہدے توں پہلے توں ای تباہ حال معیشت نوں ارباں دا نقصان ہویا۔ رہی گل نگران وزیراعلیٰ پنجاب محسن نقوی کولوں امید اے اوہ عوام اتے رحم فرماندے ہوئے اپنی مختصر جئی کابینہ تشکیل دے کر غریب لوکاں اتے اخراجات دا ہور بوجھ نہیں پان گے بلکہ اپنے تجربے تے قابلیت نال پنجاب وچ اک مثال قائم بن کے اپنے اداریاں ول پنجاب دے اداریاں نوں وی مضبوط کرو بالخصوص ڈی جی پی آر دے دھندلے شیشے نوں صاف کرن جو پنجاب وچ اوہناں دے کماں نوں عوام تک پہنچاوے گا ایہدے لئی ضروری اے کہ باہروں ڈی جی پی آر لان دی بجائے ایسے ادارے دے سینئر افسر نوں ایس ادارے دا سربراہ لا دتا جاوے جو اپنے ادارے نوں وی جاندا ہووے۔ ادارے والیاں نوں وی سمجھدا ہووے تے میڈیا والیاں نال وی دوستی رکھدا ہووے تاں جے ایہہ ادارہ وی اپنے پیراں اتے کھلوسکے۔
